ກອງປະຊຸມສາມັນຄົບຄະນະກຳມະການສູນກາງແນວລາວສ້າງຊາດ ຄັ້ງທີ 2 ສະໄໝທີ XI ໄດ້ໄຂຂຶ້ນໃນວັນທີ 11 ມັງກອນ 2023 ທີ່ຫ້ອງປະຊຸມ ສູນກາງແນວລາວສ້າງຊາດ, ພາຍໃຕ້ການເປັນປະທານຂອງ ທ່ານ ສິນລະວົງ ຄຸດໄພທູນ ກຳມະການກົມການເມືອງສູນກາງພັກ ປະທານສູນກາງແນວລາວສ້າງຊາດ, ມີພະເຖລານຸເຖລະ, ບັນດາທ່ານຮອງປະທານສູນກາງແນວລາວສ້າງຊາດ, ປະທານແນວລາວສ້າງຊາດແຂວງ-ນະຄອນຫຼວງ, ກໍາມະການສູນກາງແນວລາວສ້າງຊາດອ້ອມຂ້າງສູນກາງ, ກໍາມະການສູນກາງແນວລາວສ້າງຊາດຢູ່ຕ່າງປະເທດ, ຄະນະທີ່ປຶກສາ ແລະ ຄູ່ຮ່ວມງານ ພ້ອມດ້ວຍແຂກຖືກເຊີນເຂົ້າຮ່ວມ; ຕາງໜ້າສູນກາງສະຫະພັນແມ່ຍິງລາວເຂົ້າຮ່ວມໂດຍທ່ານນາງ ອິນລາວັນ ແກ້ວບຸນພັນ ປະທານຄະນະບໍລິຫານງານສູນກາງສະຫະພັນແມ່ຍິງລາວ. ກອງປະຊຸມຄັ້ງນີ້ ໄດ້ຈັດເປັນສອງຮູບແບບຄື: ຮູບແບບປົກກະຕິຢູ່ນະຄອນຫຼວງວຽງຈັນ ແລະ ຮູບແບບວີດີໂອທາງໄກຢູ່ບັນດາແຂວງທົ່ວປະເທດ
ໃນວາລະກອງປະຊຸມ ບັນດາຜູ້ແທນກອງປະຊຸມຈະໄດ້ຮັບຟັງບົດການລາຍງານ ແລະ ທິດທາງພັດທະນາໃນຕໍ່ໜ້າ ແລະ ພ້ອມກັນປະກອບຄຳຄິດຄຳເຫັນ ໂດຍສະເພາະ ກ່ຽວກັບການຕີລາຄາການຈັດຕັ້ງປະຕິບັດ ກອງປະຊຸມຄັ້ງທີ XI ໃນໄລຍະ 1 ປີຜ່ານມາ ແລະ ກຳນົດທິດທາງແຜນວຽກຈຸດສຸມໃນຕໍ່ໜ້າ; ການຈັດຕັ້ງປະຕິບັດແຜນພັດທະນາອົງການແນວລາວສ້າງຊາດ, ຮ່າງມະຕິກ່ຽວກກັບວຽກງານການສ້າງລາຍຮັບເພີ່ມຂອງແນວລາວສ້າງຊາດໃນໄລຍະໃໝ່, ຮ່າງບົດລາຍງານສາສະໜາທີ່ຈະລາຍງານຕໍ່ຄະນະເລຂາທິການສູນກາງພັກ; ການຄົ້ນຄວ້າສ້າງຕັ້ງສະມາຄົມຊາວກະສິກອນ; ບົດຮຽນຄະນະທີ່ປຶກສາ ເສດຖະກິດ – ກອງທຶນກ່ຽວກັບການສ້າງຕັ້ງກອງທຶນສາມັກຄີ ແລະ ພັດທະນາອົງການແນວລາວສ້າງຊາດ; ການກະກຽມກອງປະຊຸມພົບປະພີ່ນ້ອງເຊື້ອຊາດລາວຢູ່ຕ່າງປະເທດ ຄັ້ງທີ I ແລະ ພ້ອມດຽວກັນນັ້ນ ຈະໄດ້ຜ່ານລາຍຊື່ ແລະ ຮັບຮອງເອົາການຄັດເລືອກແຕ່ງຕັ້ງກຳມະການສູນກາງແນວລາຍສ້າງຊາດ ປ່ຽນແທນ. ກອງປະຊຸມໃນຄັ້ງນີ້ຈະດໍາເນີນເປັນເວລາ 2 ວັນ ແຕ່ວັນທີ 11-13 ມັງກອນ 2023.
