ກອງປະຊຸມສະຫຼຸບ ການຈັດຕັ້ງປະຕິບັດຂະບວນການແຂ່ງຂັນຮັກຊາດ ແລະ ພັດທະນາ ປະຈໍາປີ 2023

ກອງປະຊຸມສະຫຼຸບ ການຈັດຕັ້ງປະຕິບັດຂະບວນການແຂ່ງຂັນຮັກຊາດ ແລະ ພັດທະນາ ປະຈໍາປີ 2023 ແລະ ເປີດຂະບວນແຂ່ງຂັນຮັກຊາດ ແລະ ພັດທະນາ ປີ 2024 ຂອງສູນກາງສະຫະພັນແມ່ຍິງລາວ ຈັດຂຶ້ນໃນວັນທີ 23 ພະຈິກ 2023 ໂດຍການເປັນຂອງ ທ່ານ ນາງ ອາລີ ວົງໜໍ່ບຸນທຳ ກຳມະການສູນກາງພັກ ປະທານຄະນະບໍລິຫານງານສູນກາງສະຫະພັນແມ່ຍິງລາວ ມີທ່ານຮອງປະທານຄະນະບໍລິຫານງານ ສສຍລ, ຄະນະຫ້ອງການ, ກົມ, ສູນ, ຫ້ອງການ ຄຊກມດ, ສະຖານບັນການເງິນຈຸລະພາກທີຮັບເງິນຝາກເພື່ອພັດທະນາແມ່ຍິງ ແລະ ຄອບຄົວ ພ້ອມດ້ວຍພະນັກງານ ສສຍລ ເຂົ້າຮ່ວມ. ໃນພິທີ ທ່ານ ນາງ ເຫຼັກ ແສນຄຳວົງສາ ຄະນະປະຈໍາພັກ, ຫົວໜ້າກົມຈັດຕັ້ງ-ພະນັກງານ ໄດ້ຜ່ານຮ່າງບົດສະຫຼຸບການຈັດຕັ້ງປະຕິບັດຂະບວນການແຂ່ງຂັນຮັກຊາດ ແລະ ພັດທະນາ ປີ 2023 ແລະ ແຜນການແຂ່ງຂັນຂະບວນຮັກຊາດ ແລະ ພັດທະນາຂອງສູນກາງສະຫະພັນແມ່ຍິງລາວ ປະຈຳປີ 2024 ເຊິ່ງຕະຫຼອດໄລຍະ 01 ປີ ຜ່ານມາ ຄະນະພັກ, ຄະນະປະທານສູນກາງສະຫະພັນແມ່ຍິງລາວ ໄດ້ສຶກສາອົບຮົມການເມືອງ-ແນວຄິດ ໃຫ້ສະມາຊິກພັກ, ພະນັກງານ-ລັດຖະກອນດ້ວຍຫຼາຍຮູບການ ເປັນຕົ້ນ: ນໍາພາຄົ້ນຄວ້າເຊື່ອມຊືມ ເພື່ອກໍາແໜ້ນແນວທາງນະໂຍບາຍ, ມະຕິ, ຄໍາສັ່ງ, ກົດໝາຍ, ລະບຽບການຕ່າງໆຂອງພັກ, ຂອງລັດ; ຈັດປາຖະກະຖາຫວນຄືນມູນເຊື້ອວັນສໍາຄັນຂອງຊາດ, ຂອງພັກ, ຄຸນລັກສະນະທີ່ເປັນມູນເຊື້ອຂອງແມ່ຍິງລາວ, ສະພາບການທີ່ພົ້ນເດັ່ນພາຍໃນ ແລະ ຕ່າງປະເທດ ທັນກັບສະພາບການ ຈໍານວນ 09 ຄັ້ງ, ມີຜູ້ເຂົ້າຮ່ວມທັງໝົດ 1,062 ເທື່ອຄົນ (ຍິງ 918, ຊາຍ 144); ເອົາໃຈໃສ່ ນໍາພາການຜັນຂະຫຍາຍການຈັດຕັ້ງປະຕິບັດ ເນື້ອໃນຄໍາຂວັນ, ຂໍ້ແຂ່ງຂັນ 03 ດີ, ການສ້າງຄອບຄົວ ແລະ ບ້ານແມ່ຍິງ 03 ດີ ຂອງສະຫະພັນແມ່ຍິງລາວ ຕິດພັນກັບການສ້າງບ້ານພັດທະນາຕາມທິດ 03 ສ້າງ; ຊຸກຍູ້ສະຫະພັນແມ່ຍິງແຕ່ລະຮາກຖານ ທີ່ຂຶ້ນກັບສູນກາງສະຫະພັນແມ່ຍິງລາວ ເປີດຂະບວນການແຂ່ງຂັນ 03 ດີ, ມີການຕິດຕາມ, ກວດກາການຈັດຕັ້ງປະຕິບັດໃນແຕ່ລະໄລຍະ ເພື່ອກະກຽມໃຫ້ແກ່ການປະເມີນການຈັດຕັ້ງປະຕິບັດຂະບວນການດັ່ງກ່າວ ໃນທ້າຍປີ 2023 ຕາມລະບຽບການທີ່ກໍານົດໄວ້; ນໍາພາ-ຊີ້ນໍາໂດຍກົງຕໍ່ການປັບປຸງ, ບໍາລຸງ-ກໍ່ສ້າງບຸກຄະລາກອນ ທີ່ສັງກັດຢູ່ສູນກາງສະຫະພັນແມ່ຍິງລາວ ເພື່ອໃຫ້ໄດ້ໂຄງປະກອບຄົບຊຸດ, ມີຄຸນນະພາບ ແລະ ເປັນມືອາຊີບ ໂດຍອີງໃສ່ນິຕິກໍາຕ່າງໆຂອງຂັ້ນເທິງ; ສໍາເລັດການປັບປຸງຂໍ້ຕົກລົງ ວ່າດ້ວຍການຈັດຕັ້ງ ແລະ ການເຄື່ອນໄຫວຂອງກົງຈັກຊ່ວຍວຽກ, ສະຫະພັນແມ່ຍິງກະຊວງ, ອົງການ, ແຂວງ ແລະ ນະຄອນຫຼວງວຽງຈັນ ແລະ ອອກແຈ້ງການ ກ່ຽວກັບການປັບປຸງກົງຈັກການຈັດຕັ້ງຂອງສະຫະພັນແມ່ຍິງເມືອງ, ນະຄອນ ໄປຕາມທິດກະທັດຮັດ ແລະ ສອດຄ່ອງ, ແທດເໝາະກັບຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່. ພ້ອມດຽວກັນນີ້ ຄະນະຫ້ອງການ, ກົມ, ສູນ, ຫ້ອງການ ຄຊກມດ ແລະ ສະຖາບັນການເງິນຈຸລະພາກ ໄດ້ຂຶ້ນຈັບມື ເພື່ອເປີດຂະບວນການແຂ່ງຂັນຮັກຊາດ ແລະ ພັດທະນາ ຂອງສູນກາງສະຫະພັນແມ່ຍິງລາວ ປີ 2024.

ໂອກາດນີ້, ທ່ານປະທານຄະນະບໍລິຫານງານ ສສຍລ ໄດ້ໂອ້ລົມຕໍ່ກອງປະຊຸມ ໂດຍທ່ານໄດ້ເນັ້ນໜັກໃຫ້ຄະນະພັກ, ຄະນະນໍາແຕ່ລະຂັ້ນ ເອົາໃຈໃສ່ນໍາພາພະນັກງານຈັດຕັ້ງປະຕິບັດບັນດາເນື້ອໃນຂໍ້ແຂ່ງຂັນຮັກຊາດ ແລະ ພັດທະນາ ກໍຄືຂໍ້ແຂ່ງຂັນຂອງແຕ່ລະພາກສ່ວນໃຫ້ສໍາເລັດຜົນຕາມທີ່ວາງໄວ້.