ຕອນບ່າຍວັນທີ 10 ພຶດສະພາ 2023 ຊາວໜຸ່ມປະຊາຊົນປະຕິວັດລາວ ສູນກາງສະຫະພັນແມ່ຍິງລາວ ຈັດກອງປະຊຸມສະຫຼຸບວຽກງານຊາວໜຸ່ມ ປະຈຳປີ 2022 ແລະ ທິດທາງແຜນການ ປະຈຳປີ 2023 ແລະ ມອບຫຼຽນກາລະນຶກ 65 ປີ ວັນສ້າງຕັ້ງຊາວໜຸ່ມປະຊາຊົນປະຕິວັດລາວຂຶ້ນ. ໂດຍການໃຫ້ກຽດເຂົ້າຮ່ວມຂອງ ສະຫາຍ ນ. ອິນລາວັນ ແກ້ວບຸນພັນ ກຳມະການສູນກາງພັກ ເລຂາຄະນະບໍລິຫານງານພັກ ປະທານຄະນະບໍລິຫານງານ ສສຍລ, ສະຫາຍ ທອງຈັນ ພູມີພັນ ຮອງເລຂາຄະນະບໍລິຫານງານຊາວໜຸ່ມປະຊາຊົນປະຕິວັດລາວ; ມີບັນດາຮອງປະທານຄະນະບໍລິຫານງານ ສສຍລ, ຄະນະຫ້ອງການ, ກົມ, ສູນ, ຫ້ອງການ ຄຊກມດ, ສະຖາບັນການເງິນຈຸລະພາກ, ຄະນະຮາກຖານຊາວໜຸ່ມ ສສຍລ ແຕ່ລະຮາກຖານ ພ້ອມດ້ວຍສະມາຊິກຂາວໜຸ່ມ ສສຍລ ເຂົ້າຮ່ວມ.
ຜູ້ເຂົ້າຮ່ວມກອງປະຊຸມໄດ້ຮັບຟັງການຜ່ານບົດສະຫຼຸບວຽກງານຊາວໜຸ່ມ ປະຈຳປີ 2022 ແລະ ທິດທາງແຜນການປີ 2023 ຈາກ ສະຫາຍ ນ. ສຸກພາພອນ ຜານິດ ເລຂາຄະນະບໍລິຫານງານຊາວໜຸ່ມ ສູນກາງສະຫະພັນແມ່ຍິງລາວ ເຊິ່ງໄລຍະຜ່ານມາຄະນະບໍລິຫານງານຊາວໜຸ່ມ ສສຍລ ໄດ້ເອົາໃຈໃສ່ ແລະ ຖືສໍາຄັນຕໍ່ວຽກງານສຶກສາອົບຮົມການເມືອງ-ແນວຄິດ ໂດຍໄດ້ນໍາພາ-ຊີ້ນໍາໃຫ້ຄະນະຊາວໜຸ່ມແຕ່ລະຮາກຖານ ຊຸກຍູ້ສະມາຊິກເຂົ້າຮ່ວມເຊື່ອມຊຶມເອກະສານສໍາຄັນຕ່າງໆຂອງພັກ, ຂອງຊາດ; ແນະນຳ, ຊຸກຍູ້, ຕິດຕາມ ການຈັດຕັ້ງປະຕິບັດ ຂໍ້ແຂ່ງຂັນ 4 ບຸກ ຂອງແຕ່ລະໜ່ວຍຊາວໜຸ່ມຮາກຖານ ຊຶ່ງສາມາດປະຕິບັດ 8 ໜ່ວຍ ເທົ່າກັບ 90%, ສະມາຊິກ ແຂງໄດ້ 96 ສະຫາຍ ເທົ່າກັບ 87,27%, ກາງ 14 ສະຫາຍ ເທົ່າກັບ 12,72% ຂອງຜູ້ໄດ້ຮັບການປະເມີນ; ຈັດຂະບວນສັກວັກຊີນກັນພະຍາດໂຄວິດ-19 ພ້ອມດຽວກັນນີ້ໄດ້ຊຸກຍູ້ສະມາຊິກຊາວໜຸ່ມສ້າງລາຍຮັບເຂົ້າຄັງສະຫວັດດີການ ຂອງ 03 ອົງການຈັດຕັ້ງມະຫາຊົນຂອງພາກສ່ວນຕົນຕາມເງື່ອນໄຂຕົວຈິງ; ເອົາໃຈໃສ່ຕິດຕາມ ແລະ ປົກປ້ອງສິດຜົນປະໂຫຍດອັນຊອບທຳຂອງສະມາຊິກ ແລະ ຊ່ວຍເຫຼືອກັນໃນເວລາເຈັບເປັນ, ພົບຄວາມຫຍຸ້ງຍາກ,ເອົາໃຈໃສ່ປະຕິບັດກົດລະບຽບຂອງຊາວໜຸ່ມ ປະຊາຊົນປະຕິວັດລາວ, ການນຸ່ງເຄື່ອງແບບຂອງຊາວໜຸ່ມແມ່ນກຳນົດເອົາທຸກໆວັນພະຫັດ ແລະ ເສຍເງິນສະຕິ ເປັນປົກກະຕິ; ປຸກລະດົມສະມາຊິກນໍາໃຊ້ນໍ້າ, ໄຟຟ້າຢ່າງປະຢັດ ພ້ອມທັງຮັກສາຄວາມສະຫງົບຄວາມປອດໄພ, ຄວາມສະອາດ ແລະ ຄວາມເປັນລະບຽບຮຽບຮ້ອຍພາຍໃນສຳນັກງານຂອງຕົນ, ປະກອບສ່ວນໃນການເວນຍາມເພື່ອປ້ອງກັນການແຜ່ລະບາດພະຍາດໂຄວິດ-19 ແລະ ອື່ນໆ.
ໂອກາດທີ່ມີຄວາມໝາຍສຳຄັນນີ້ກອງປະຊຸມໄດ້ຮັບຟັງການໃຫ້ຄຳໂອ້ລົມຈາກສະຫາຍເລຂາຄະນະບໍລິຫານງານ ສສຍລ ແລະ ສະຫາຍຮອງເລຂາຄະນະບໍລິຫານງານຊາວໜຸ່ມປະຊາຊົນປະຕິວັດລາວ ຊຶ່ງທັງສອງສະຫາຍໄດ້ຍ້ອງຍໍຊົມເຊີຍຕໍ່ຜົນງານທີ່ຍາດມາໄດ້ໃນໄລຍະ 1 ປີຜ່ານມາ ພ້ອມນີ້ກໍ່ໄດ້ເນັ້ນໃຫ້ຄະນະບໍລິຫານງານຊາວໜຸ່ມ ສສຍລ ກໍ່ຄືຄະນະຮາກຖານຊາວໜຸ່ມ ສສຍລ ເສີມຂະຫຍາຍມູນເຊື້ອອັນດີງາມຂອງຊາວໜຸ່ມ, ເອົາໃຈໃສ່ວຽກງານສຶກສາອົບຮົມການເມືອງແນວຄິດ, ປັບປຸງ-ແກ້ໄຂຂໍ້ຄົງຄ້າງ ແລະ ສິ່ງທ້າທາຍໃຫ້ບັນລຸຕາມຄາດໝາຍທີ່ວາງໄວ້.
ນອກຈາກນີ້ກອງປະຊຸມໄດ້ມີພິທີມອບຫຼຽນກາລະນຶກ 65 ປີ ວັນສ້າງຕັ້ງຄະນະຊາວໜຸ່ມປະຊາຊົນປະຕິວັດລາວ ໃຫ້ແກ່ບຸກຄົນ ສສຍລ ທີ່ມີຜົນງານດີເດັ່ນໃນການປະກອບ ສ່ວນວຽກງານຊາວໜຸ່ມປະຊາຊົນປະຕິວັດລາວ ໃນໄລຍະຜ່ານມານຳຕື່ມອີກ.
