ກອງປະຊຸມລະດັບສູງເພື່ອທົບທວນການຈັດຕັ້ງປະຕິບັດວຽກງານສິດທິເດັກ ຢູ່ ສປປ ລາວ

Nov 18, 2022 | ຂ່າວສານ, ຂ່າວສານ ແລະ ກິດຈະກຳ

ວັນທີ 18 ພະຈິກ 2022 ຄະນະກຳມະທິການແຫ່ງຊາດ ເພື່ອຄວາມກ້າວໜ້າຂອງແມ່ຍິງ ແລະ ແມ່-ເດັກ ຈັດກອງປະຊຸມລະດັບສູງເພື່ອທົບທວນການຈັດຕັ້ງປະຕິບັດວຽກງານສິດທິເດັກ ຢູ່ ສປປ ລາວ ໂດຍການເປັນປະທານຂອງ ທ່ານ ນາງ ອິນລາວັນ ແກ້ວບຸນພັນ ປະທານຄະນະບໍລິຫານງານ ສສຍລ, ຮອງປະທານ ຜູ້ປະຈຳການ ຄຊກມດ; ເຂົ້າຮ່ວມໂດຍ ທ່ານ ນ. ເພຍ ເຣເບນໂລ ບຣິໂຕ ຜູ້ຕາງໜ້າອົງການຢູ່ນິເຊັບ ປະຈໍາ ສປປ ລາວ; ມີ ບັນດາທ່ານຮອງເຈົ້າແຂວງ, ປະທານ, ຮອງປະທານ ຄກມດ 18 ແຂວງ, ປະທານ ຮອງປະທານ ຄກມດ ກະຊວງ-ອົງການ ພ້ອມດ້ວຍແຂກຖືກເຊີນ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ໃນວາລະກອງປະຊຸມ ຜູ້ເຂົ້າຮ່ວມໄດ້ຮັບຟັງການນຳສະເໜີຜົນການຈັດຕັ້ງປະຕິບັດຄວາມໝາຍໝັ້ນຂອງທ່ານຮອງເຈົ້າແຂວງ ເພື່ອຫຼຸດຜ່ອນຄວາມທຸກຍາກຂອງເດັກ ປະຈຳປີ 2021-2022 ແລະ ແຜນການປີ 2023 ໂດຍສະເພາະແມ່ນດ້ານໂພຊະນາການ, ດ້ານສຸຂະພາບ, ດ້ານການສຶກສາ, ດ້ານນໍ້າສະອາດ; ການນໍາສະເໜີຜົນການຈັດຕັ້ງປະຕິບັດຄວາມໝາຍໝັ້ນຂອງພາກສ່ວນທຸລະກິດເອກະຊົນ ເພື່ອຫຼຸດຜ່ອນຄວາມທຸກຍາກຂອງເດັກ ປະຈໍາປີ 2021-2022 ແລະ ແຜນການປີ 2023 ແລະ ການນໍາສະເໜີຜົນການຈັດຕັ້ງປະຕິບັດຄວາມໝາຍໝັນຂອງອົງການຈັດຕັ້ງສາກົນທີ່ບໍ່ສັງກັດລັດຖະບານ ເພື່ອຫຼຸດຜ່ອນຄວາມທຸກຍາກຂອງເດັກ ປະຈໍາປີ 2021-2022 ແລະ ແຜນການປີ 2023. ພ້ອມດຽວກັນນີ້ຜູ້ເຂົ້າຮ່ວມຍັງໄດ້ປະກອບຄຳຄິດຄຳເຫັນຕໍ່ກອງປະຊຸມຢ່າງກົງໄປກົງມາ ເພື່ອໃຫ້ມີເນື້ອໃນຄົບຖ້ວນສົມບູນ ແລະ ຍັງໄດ້ຮັບຟັງຄໍາເຫັນຈາກຕົວແທນເດັກ ກ່ຽວກັບການມີສ່ວນຮ່ວມຂອງເດັກໃນຄອບຄົວ ແລະ ສັງຄົມ ໃນການປ້ອງກັນການລະບາດຂອງພະຍາດໂຄວິດ-19 ຕື່ມອີກ.
ໂອກາດທີ່ມີຄວາມໝາຍສຳຄັນນີ້ ທ່ານປະທານຄະນະບໍລິຫານງານ ສສຍລ, ຮອງປະທານ ຜູ້ປະຈໍາການ ຄຊກມດ ໄດ້ເນັ້ນໃຫ້ທຸກພາກສ່ວນສືບຕໍ່ເອົາໃຈໃສ່ການຈັດຕັ້ງປະຕິບັດວຽກງານທາງດ້ານໂພຊະນາການ, ການສຶກສາ, ສາທາລະນະສຸກ ແລະ ນໍ້າສະອາດ ໃຫ້ບັນລຸຕາມເປົ້າໝາຍທີ່ວາງໄວ້.