ກອງປະຊຸມພົບປະສອງຝ່າຍລະຫວ່າງ ສະຫະພັນແມ່ຍິງລາວ ໃຫ້ກຽດເປັນປະທານໂດຍ: ທ່ານ ນາງ ອິນລາວັນ ແກ້ວບຸນພັນ ກຳມະການສູນກາງພັກ, ປະທານຄະນະບໍລິຫານງານ ສູນກາງສະຫະພັນແມ່ຍິງລາວ ແລະ ສະຫະພັນແມ່ຍິງຫວຽດນາມ ໃຫ້ກຽດເປັນປະທານໂດຍ ທ່ານ ນາງ ຮ າທິ ຫງ່າ, ກຳມະການສູນກາງພັກ, ປະທານຄະນະບໍລິຫານງານສູນກາງສະຫະພັນແມ່ຍິງຫວຽດນາມ ມີຄະນະປະທານ, ຮອງປະທານ, ປະທານສະຫະພັນແມ່ຍິງບັນດາແຂວງແຮກສ່ຽວຝ່າຍຫວຽດນາມ, ຜູ້ຕາງໜ້າຈາກຄະນະພົວພັນຕ່າງປະເທດສູນກາງພັກ, ສະມາຄົມມິດຕະພາບລາວ-ຫວຽດນາມ, ຫົວໜ້າກົມ, ຫ້ອງການ ຄຊກມດ ແລະ ພາກສ່ວນກ່ຽວຂ້ອງ ໄດ້ຈັດຂຶ້ນຢູ່ສູນກາງສະຫະພັນແມ່ຍິງລາວ ໃນວັນທີ 4 ເມສາ 2023.
ກອງປະຊຸມຄັ້ງນີ້ທ່ານ ປະທານ ສສຍລ ໄດ້ກ່າວຕ້ອນຮັບຢ່າງອົບອຸ່ນຕໍ່ການເດີນທາງມາຢ້ຽມຢາມແລະ ເຮັດວຽກຢ່າງເປັນທາງການພ້ອມທັງໄດ້ນຳສະເໜີໂດຍສັງເຂບກ່ຽວກັບຜົນສຳເລັດທີ່ສະຫະພັນແມ່ຍິງລາວ ສາມາດຍາດໄດ້ໃນໄລຍະ 01 ປີຜ່ານມາ, ເຊິ່ງເປັນໄລຍະທີ່ສອງຊາດລາວ-ຫວຽດນາມ ເວົ້າລວມເວົ້າສະເພາະສອງສະຫະພັນແມ່ຍິງລາວ-ຫວຽດນາມ ສືບຕໍ່ຮັກສາມູນເຊື້ອຄວາມສາມັກຄີພິເສດ, ການພົວພັນຮ່ວມມື, ດ້ວຍການຈັດຕັ້ງປະຕິບັດຫຼາກຫຼາຍກິດຈະກຳ ແນໃສ່ຜັນຂະຫຍາຍບົດບັນທຶກການຮ່ວມມື 2017-2022, ເຖິງວ່າປະເຊີນກັບການແຜ່ລະບາດຂອງພະຍາດໂຄວິດ-19 ເປັນວົງກວ້າງ ນັບທັງພາກພື້ນ ແລະ ສາກົນ ເຊິ່ງສອງປະເທດ ກໍໄດ້ຮັບຜົນກະທົບໃນຫຼາຍດ້ານ, ແຕ່ສະຫະພັນແມ່ຍິງສອງຊາດ ກໍໄດ້ມີຄວາມພະຍາຍາມເອົາໃຈໃສ່ ແລະ ຈັດຕັ້ງປະຕິບັດບົດບັນທຶກການຮ່ວມມື ດ້ວຍຫຼາຍຮູບການ, ສົ່ງຂໍ້ມູນຂ່າວສານແລກປ່ຽນເຊິ່ງກັນ ແລະ ກັນ, ປຸກລະດົມເອື້ອຍນ້ອງແມ່ຍິງ ແລະ ທົ່ວສັງຄົມ ໃຫ້ປະກອບສ່ວນຊ່ວຍເຫຼືອເຊິ່ງກັນ ແລະ ກັນ ໃນການແກ້ໄຂຟື້ນຟູຊີວິດການເປັນຢູ່ ກ້າວໄປເຖິງການປະກາດເປີດ 2 ປະເທດໃຫ້ຄືນສູ່ສະພາບປົກກະຕິ, ເຮັດໃຫ້ການດຳລົງຊີວິດ, ການພັດທະນາເສດຖະກິດ-ສັງຄົມ ແລະຄອບຄົວ ໄດ້ຮັບການປັບປຸງດີຂຶ້ນເທື່ອລະກ້າວ. ພ້ອມດຽວກັນນີ້ ພາຍຫຼັງທີ່ສະຫະພັນແມ່ຍິງສອງປະເທດ ໄດ້ເຊັນບົດບັນທຶກການຮ່ວມມື ໃນໄລຍະປີ 2023-2027 ເຊິ່ງມີ 8 ວຽກຕົ້ນຕໍ ສາມາດຈັດຕັ້ງປະຕິບັດມີຜົນສຳເລັດຄືດັ່ງນີ້:
1. ສືບຕໍ່ເສີມຂະຫຍາຍສາຍພົວພັນມິດຕະພາບຄວາມສາມັກຄີພິເສດ ແລະ ການຮ່ວມມືຮອບດ້ານທີ່ເປັນມູນເຊື້ອລະຫວ່າງສອງຊາດລາວ-ຫວຽດນາມ, ຫວຽດນາມ-ລາວ ດ້ວຍ ການໂຄສະນາສຶກສາອົບຮົມໃຫ້ ສະມາຊິກສະຫະພັນແມ່ຍິງ, ແມ່ຍິງລາວບັນດາເຜົ່າ ໃຫ້ຮັບຮູ້ເຂົ້າໃຈຕໍ່ມູນເຊື້ອແຫ່ງສາຍພົວພັນມິດຕະພາບ, ການຮ່ວມມືຮອບດ້ານ ແລະ ຄວາມສາມັກຄີແບບພິເສດ, ເສີມຂະຫຍາຍສາຍພົວພັນຮ່ວມມືຮອບດ້ານກັບສະຫະພັນແມ່ຍິງຫວຽດນາມ ໂດຍສະເພາະສະຫະພັນແມ່ຍິງແຂວງແຮກສ່ຽວ ທີ່ມີຊາຍແດນຕິດກັນ ໃຫ້ນັບມື້ນັບແໜ້ນແຟ້ນ.
2. ຈັດກອງປະຊຸມທາງໄກ ແມ່ຍິລາວ-ຫວຽດນາມ-ກໍາປູເຈຍ ເຊື່ອມໂຍງ, ຮ່ວມມື ເພື່ອການພັດທະນາສີຂຽວ ແລະ ຍືນຍົງ ໃນໂລກທີ່ມີພະຍາດໂຄວິດ-19.
3. ຮ່ວມກັບຄະນະພັກ-ອົງການປົກຄອງຂອງກະຊວງ-ອົງການ ແລະ ທ້ອງຖິ່ນ ສືບຕໍ່ເຄື່ອນໄຫວສະເຫຼີມສະຫຼອງ 2 ວັນປະຫວັດສາດ ດ້ວຍບັນຍາກາດທີ່ຟົດຟື້ນ.
4. ຊຸກຍູ້ສົ່ງເສີມສ້າງເງື່ອນໄຂໃຫ້ການນໍາ ໄປຝຶກອົບຮົມວຽກງານພັດທະນາແມ່ຍິງ ຢູ່ ສສ ຫວຽດນາມ ຈໍານວນ 15 ທ່ານ, ສຳຫຼັບນະຄອນຫຼວງວຽງຈັນ ຈໍານວນ 20 ທ່ານ ລວມ 35 ທ່ານ.
5. ບັນດາສະຫະພັນແມ່ຍິງແຂວງແຮກສ່ຽວ ແລະ ໃກ້ຄຽງກໍ່ໄດ້ສືບຕໍ່ບົດບັນທຶກການຮ່ວມມື ແລະ ຊ່ວຍເຫຼືອໃຫ້ທຶນນັກສຶກສາ, ຊ່ວຍເຫຼືອຜູ້ດ້ອຍໂອກາດ, ຝຶກອົບຮົມວິຊາຊີບ ແລະ ພັດທະນາອື່ນໆ.
6. ສະຫະພັນແມ່ຍິງກະຊວງ-ອົງການ ກໍ່ໄດ້ມີການແລກປ່ຽນບົດຮຽນຊຶ່ງກັນ ແລະ ກັນ ໃນການ ເຄື່ອນໄຫວວຽກສະຫະພັນແມ່ຍິງ ເປັນຕົ້ນ: ກະຊວງການຕ່າງປະເທດ, ກະຊວງແຜນການ ແລະ ການລົງທຶນ ແລະ ອື່ນໆ.
7. ໃຫ້ການສະໜັບສະໜູນຊ່ວຍເຫລືອຊຶ່ງກັນ ແລະ ກັນ ໃນເວລາເຂົ້າຮ່ວມກອງປະຊຸມລະດັບຕ່າງໆ ໃນພາກພື້ນ ແລະ ສາກົນ ເປັນຕົ້ນ: ກອງປະຊຸມຄະນະກຳມະການແມ່ຍິງອາຊຽນ, ກອງປະຊຸມຄະນະກຳມາທິການອາຊຽນ ເພື່ອສົ່ງເສີມ ແລະ ປົກປ້ອງສິດທິຂອງແມ່ຍິງ ແລະ ເດັກນ້ອຍ ແລະ ອື່ນໆ.
ນອກຈາກນີ້ສະຫະພັນແມ່ຍິງ ຫວຽດນາມ ໄດ້ມອບຄອມພິວເຕີ້ 5 ຊຸດ, ເຄື່ອງພິມ 2 ຊຸດລວມມູນຄ່າ 5,220 ໂດລາສະຫະລັດ ໃຫ້ກັບ ສູນກາງສະຫະພັນແມ່ຍິງລາວ ເພື່ອໝູນໃຊ້ເຂົ້າໃນວຽກງານຕື່ມອີກ.
