ໂທລະສັບ 021 316253

ກອງປະຊຸມພົບປະສອງຝ່າຍລະຫວ່າງ ສະຫະພັນແມ່ຍິງລາວ ແລະ ສະຫະພັນແມ່ຍິງກູບາ

May 26, 2023 | ຂ່າວສານ ແລະ ກິດຈະກຳ, ເດັ່ນ

ກອງປະຊຸມພົບປະສອງຝ່າຍລະຫວ່າງ ສະຫະພັນແມ່ຍິງລາວ ໃຫ້ກຽດເປັນປະທານໂດຍ: ທ່ານ ນາງ ອິນລາວັນ ແກ້ວບຸນພັນ ກຳມະການສູນກາງພັກ, ປະທານຄະນະບໍລິຫານງານ ສູນກາງສະຫະພັນແມ່ຍິງລາວ ແລະ ສະຫະພັນແມ່ຍິງກູບາ ໃຫ້ກຽດເປັນປະທານໂດຍ ທ່ານ ນາງ ເຕເຣສາ ອາມາເຣເຢບຸຍ, ກຳມະການກົມການເມືອງສູນກາງພັກ, ສະມາຊິກສະພາແຫ່ງລັດ, ເລຂາທິການໃຫຍ່ຂອງສະຫະພັນແມ່ຍິງແຫ່ງຊາດກູບາ; ມີທ່ານ ສຈ. ປອ. ຈະເລີນ ເຢຍປາວເຮີ ຮອງປະທານສະພາແຫ່ງຊາດ ປະທານກຳມາທິການກົດໝາຍ, ປະທານສະມາຄົມມິດຕະພາບລາວ-ກູບາ ; ພ້ອມດ້ວຍຄະນະປະທານ, ຮອງປະທານ, ເອກອັກຄະລັດຖະທູດວິສາມັນ ຜູ້ມີອຳນາດເຕັມ ແຫ່ງສ.ກູບາ ປະຈໍາ ສປປ ລາວ, ທ່ານຜູ້ຕາງໜ້າຄະນະພົວພັນຕ່າງປະເທດສູນກາງພັກ, ຫົວໜ້າກົມ, ສູນ, ຫ້ອງການ ຄຊກມດ ແລະ ພາກສ່ວນກ່ຽວຂ້ອງເຂົ້າຮ່ວມຢ່າງພ້ອມພຽງ. ກອງປະຊຸມໄດ້ຈັດຂຶ້ນຢູ່ສູນກາງສະຫະພັນແມ່ຍິງລາວ ໃນຕອນບ່າຍວັນທີ 17 ພຶດສະພາ 2023.
ໃນວາລະກອງປະຊຸມ ທ່ານ ປະທານ ສສຍລ ໄດ້ກ່າວຕ້ອນຮັບຢ່າງອົບອຸ່ນຕໍ່ການເດີນທາງມາຢ້ຽມຢາມແລະ ເຄື່ອນໄຫວເຮັດວຽກຢ່າງເປັນທາງການ ພ້ອມທັງໄດ້ນຳສະເໜີໂດຍສັງເຂບກ່ຽວກັບຜົນສຳເລັດທີ່ສະຫະພັນແມ່ຍິງລາວ ສາມາດຍາດໄດ້ໃນໄລຍະຜ່ານມາ ເວົ້າລວມ ເວົ້າສະເພາະສອງສະຫະພັນແມ່ຍິງລາວ ແລະ ສະຫະພັນແມ່ຍິງກູບາ ສືບຕໍ່ຮັກສາມູນເຊື້ອຄວາມສາມັກຄີພິເສດ, ການພົວພັນຮ່ວມມື, ດ້ວຍການຈັດຕັ້ງປະຕິບັດຫຼາກຫຼາຍກິດຈະກຳ ແນໃສ່ຜັນຂະຫຍາຍບົດບັນທຶກການຮ່ວມມື 2023-2027 ເຊິ່ງມີ 5 ວຽກຕົ້ນຕໍ ຄືດັ່ງນີ້: ການແລກປ່ຽນຄະນະຜູ້ແທນຂັ້ນສູງ; ການສຶກສາອົບຮົມການເມືອງ-ແນວຄິດ ແລະ ພັດທະນາແມ່ຍິງ; ການແລກປ່ຽນຂໍ້ມູນຂ່າວສານ, ວັດທະນະທຳ ແລະ ຮີດຄອງປະເພນີ; ການຈັດຕັ້ງປະຕິບັດກິດຈະກຳ (ຮ່ວມກັນຕາມເງື່ອນໄຂຕົວຈິງໃນແຕ່ລະໄລຍະ); ການພົວພັນຮ່ວມມືສາກົນ ເວົ້າສະເພາະການສະໜັບສະໜູນຊ່ວຍເຫຼືອເຊິ່ງກັນ ແລະ ກັນໃນເວທີພາກພື້ນ-ສາກົນ; ພ້ອມດຽວກັນນີ້ ເຖິງວ່າຈະເປັນໄລຍະທີ່ປະສົບການການແຜ່ລະບາດຂອງພະຍາດໂຄວິດ-19 ເປັນວົງກວ້າງ ທັງພາກພື້ນ ແລະ ສາກົນ ແຕ່ສອງປະເທດກໍໄດ້ຮັບຜົນສຳເລັດຫຼາຍດ້ານ, ສະຫະພັນແມ່ຍິງສອງຊາດ ໄດ້ເອົາໃຈໃສ່ຢ້ຽມຢາມຖາມຂ່າວ, ສົ່ງຂໍ້ມູນຂ່າວສານເຊິ່ງກັນແລະກັນ, ປຸກລະດົມເອື້ອຍນ້ອງແມ່ຍິງ ແລະ ທົ່ວສັງຄົມ ໃຫ້ປະກອບສ່ວນຊ່ວຍເຫຼືອເຊິ່ງກັນ ແລະ ກັນ ກ້າວໄປເຖິງການປະກາດເປີດປະເທດຂອງ 2 ປະເທດລາວ-ກູບາ, ເຮັດໃຫ້ການດຳລົງຊີວິດ, ການພັດທະນາເສດຖະກິດ- ສັງຄົມ ນັບມື້ນັບດີຂຶ້ນເທື່ອລະກ້າວ.
ນອກຈາກນີ້ປະທານ ຄະນະບໍລິຫານງານ ສສຍລ ໄດ້ນຳສະເໜີທິດທາງແຜນການ ການພົວພັນຮ່ວມມືໃນຕໍ່ໜ້າ ລະຫວ່າງສະຫະພັນແມ່ຍິງທັງສອງປະເທດ ໂດຍຈະສືບຕໍ່ຈັດຕັ້ງປະຕິບັດ ບົດບັນທຶກການຮ່ວມມື (MOU) 2023-2027 ໃຫ້ມີປະສິດທິພາບ ແລະ ປະສິດທິຜົນສູງຂຶ້ນກວ່າເກົ່າເປັນຕົ້ນ:
1.ຊຸກຍູ້ໃຫ້ມີການພົວພັນ ແລະ ຮ່ວມມືອັນເປັນມູນເຊື້ອ, ມິດຕະພາບແບບພິເສດ ແລະ ການແລກປ່ຽນຄະນະຜູ້ແທນລະຫວ່າງສອງປະເທດ ແລະ ຊຸກຍູ້ການຮ່ວມມືລະຫວ່າງ ສະຫະພັນແມ່ຍິງລາວ- ສະຫະພັນແມ່ຍິງກູບາ.
2. ສຶກສາອົບຮົມການເມືອງ-ແນວຄິດ ໃຫ້ສະຫະພັນແມ່ຍິງ ແລະ ແມ່ຍິງ ໃນການສົ່ງເສີມການຮ່ວມມືທີ່ເປັນມູນເຊື້ອຂອງສອງພັກ, ສອງລັດ ແລະ ສອງອົງການຈັດຕັ້ງແມ່ຍິງຂອງສອງປະເທດໃຫ້ເລິກເຊິ່ງ ແລະ ກວ້າງຂວາງ, ເອົາໃຈໃສ່ເປັນພິເສດຕໍ່ການມີສ່ວນຮ່ວມຂອງແມ່ຍິງໃນການກໍ່ສ້າງພັກ-ພະນັກງານ ແລະ ສົ່ງເສີມການສຶກສາໃຫ້ພະນັກງານສະຫະພັນແມ່ຍິງລາວໄປຍົກລະດັບຄວາມຮູ້ດ້ານວິຊາສະເພາະໄລຍະຍາວ, ໄລຍະສັ້ນ ຢູ່ ສ ກູບາ ຕາມສະພາບ ແລະເງື່ອນໄຂຕົວຈິງ.
3. ສອງຝ່າຍຈະຊຸກຍູ້ການແລກປ່ຽນວັດທະນະທຳ, ຮີດຄອງປະເພນີ, ພັດທະນາສື່ສິ່ງພິມ ເພື່ອເປັນເຄື່ອງມືໃນການເຜີຍແຜ່ໃຫ້ແມ່ຍິງ ແລະ ປະຊາຊົນ, ຄົນຮຸ່ນໜຸ່ມ ກ່ຽວກັບການອະນຸລັກຮັກສາມູນເຊື້ອວັດທະນະທຳ, ຮີດຄອງປະເພນີອັນດີງາມ ແລະ ການທ່ອງທ່ຽວທີ່ເປັນເອກະລັກ.
4. ຈັດກອງປະຊຸມລະດັບຕ່າງໆລະຫວ່າງສອງອົງການຈັດຕັ້ງສະຫະພັນແມ່ຍິງລາວ-ສະຫະພັນແມ່ຍິງກູບາ ເພື່ອແລກປ່ຽນບົດຮຽນ ແລະ ຮັບຮູ້ຂໍ້ມູນຂ່າວສານຕ່າງໆ ເຊິ່ງກັນ ແລະ ກັນ
5. ສືບຕໍ່ສະໜັບສະໜູນເຊິ່ງກັນ ແລະ ກັນ ໃນການຈັດຕັ້ງປະຕິບັດຄຳໝັ້ນສັນຍາທີ່ສອງປະເທດເປັນພາຄີຂອງສາກົນທີ່ຕິດພັນກັບວຽກແມ່ຍິງ ແລະ ເດັກນ້ອຍ ເປັນຕົ້ນ: ສົນທິສັນຍາວ່າດ້ວຍການລົບລ້າງທຸກຮູບການຈຳແນກຕໍ່ແມ່ຍິງ (CEDAW), ສິດທິເດັກ (CRC), ການຈັດຕັ້ງປະຕິບັດຖະແຫຼງການ ແລະ ແຜນປະຕິບັດງານປັກກິ່ງ, ການຈັດຕັ້ງປະຕິບັດ ເປົ້າໝາຍການພັດທະນາແບບຍືນຍົງ 2030 ແລະ ອື່ນໆ.