ກອງປະຊຸມພົບປະສອງຝ່າຍລະຫວ່າງສະຫະພັນແມ່ຍິງຫວຽດນາມ ແລະ ສະຫະພັນແມ່ຍິງແຂວງຫຼວງພະບາງ ຈັດຂຶ້ນຢູ່ຫ້ອງປະຊຸມຂອງສະຫະພັນແມ່ຍິງແຂວງຫຼວງພະບາງ ໃນວັນທີ 05 ເມສາ 2023. ໃຫ້ກຽດເປັນປະທານໂດຍ ທ່ານ ນາງ ຮາທິ ຫງ່າ, ກຳມະການສູນກາງພັກ, ປະທານຄະນະບໍລິຫານງານສູນກາງສະຫະພັນແມ່ຍິງຫວຽດນາມ ແລະ ທ່ານ ນາງ ອິນທະວອນ ພົມມະຈັນ ປະທານຄະນະບໍລິຫານງານສະຫະພັນແມ່ຍິງລາວ, ມີທ່ານ ນາງ ສິລິກິດ ບຸບຜາ ຮອງປະທານຄະນະບໍລິຫານງານສສຍລ, ປະທານສະຫະພັນແມ່ຍິງບັນດາແຂວງແຮກສ່ຽວຝ່າຍຫວຽດນາມ, ຜູ້ຕາງໜ້າຈາກຂະແໜງການກ່ຽວຂ້ອງແຂວງ, ຄະນະຮັບຜິດຊອບ ລາວ-ຫວຽດນາມ ເຂົ້າຮ່ວມ.
ກອງປະຊຸມຄັ້ງນີ້ທ່ານ ປະທານສະຫະພັນແມ່ຍິງແຂວງຫຼວງພະບາງ ໄດ້ກ່າວຕ້ອນຮັບຢ່າງອົບອຸ່ນຕໍ່ການເດີນທາງມາຢ້ຽມຢາມ ແລະ ເຮັດວຽກຢ່າງເປັນທາງການໃນຄັ້ງນີ້, ພ້ອມທັງໄດ້ນຳສະເໜີໂດຍສັງເຂບກ່ຽວກັບຜົນສຳເລັດທີ່ສະຫະພັນແມ່ຍິງແຂວງ ສາມາດຍາດໄດ້ໃນໄລຍະ 01 ປີຜ່ານມາ ເວົ້າລວມ ເວົ້າສະເພາະວຽກພົວພັນຮ່ວມມືກັບປະເທດເພື່ອນມິດຍຸດທະສາດ ແລະ ສາກົນ. ປະຈຸບັນສະຫະພັນແມ່ຍິງແຂວງຫຼວງພະບາງໄດ້ເຊັນບົດບັນທຶກຮ່ວມມືກັບສະຫະພັນແມ່ຍິງແຂວງດຽນບຽນ ສສ ຫວຽດນາມ ເປັນຄັ້ງທີ 02 ເພື່ອພ້ອມກັນພັດທະນາວຽກງານແມ່ຍິງລະຫວ່າງ 02 ແຂວງ ເປັນຕົ້ນແມ່ນພັດທະນາທາງດ້ານຊັບພະຍາກອນມານຸດ ເຊິ່ງປີນີ້ໄດ້ສົ່ງເອື້ອຍນ້ອງແມ່ຍິງໄປຍົກລະດັບດ້ານທິດສະດີຊັ້ນກາງ ຢູ່ແຂວງດຽນບຽນ ສສ ຫວຽດນາມ 02 ທ່ານ. ນອກນັ້ນ ໃນແຕ່ລະປີ ສະຫະພັນແມ່ຍິງແຂວງຍັງໄດ້ປະສານສົມທົບກັບກົງສູນຫວຽດນາມ ປະຈຳພາກເໜືອ ເພື່ອຈັດກິດຈະ ກຳ ແລະ ເຂົ້າຮ່ວມພິທີສະເຫຼີມສະຫຼອງວັນແມ່ຍິງສາກົນ, ວັນສ້າງຕັ້ງສະຫະພັນແມ່ຍິງລາວ ແລະວັນສໍາຄັນຕ່າງໆ.
ໂອກາດນີ, ສະຫະພັນແມ່ຍິງຫວຽດນາມ ໄດ້ມອບຄອມພິວເຕີ້ 02 ຊຸດ ແລະ USB ຈຳນວນໜຶ່ງ ໃຫ້ກັບ ສະຫະພັນແມ່ຍິງແຂວງຫຼວງພະບາງ ເພື່ອໝູນໃຊ້ເຂົ້າໃນວຽກງານຕື່ມອີກ.
