ໂທລະສັບ 021 316253

ກອງປະຊຸມປຶກສາຫາລືໃສ່ຮ່າງລາຍງານການຄົ້ນຄ້ວາ ແລະ ສື່ໂຄສະນາການຮັກສາສິ່ງແວດລ້ອມໃຫ້ຊຸມຊົນ

Jul 4, 2023 | ຂ່າວສານ ແລະ ກິດຈະກຳ

ວັນທີ 30 ມິຖຸນາ 2023 ກົມພັດທະນາແມ່ຍິງລາວ ສູນກາງສະຫະພັນແມ່ຍິງລາວ ຮ່ວມກັບສະຫະພັນແມ່ຍິງແຂວງເຊກອງ ໄດ້ຈັດກອງປະຊຸມປຶກສາຫາລືໃສ່ຮ່າງລາຍງານການຄົ້ນຄ້ວາ ແລະ ສື່ໂຄສະນາການຮັກສາສິ່ງແວດລ້ອມໃຫ້ຊຸມຊົນ ຂຶ້ນທີ່ຫ້ອງປະຊຸມພະແນກຊັບພະຍາກອນທໍາມະຊາດ ແລະ ສິ່ງແວດລ້ອມແຂວງເຊກອງ ໂດຍການເປັນປະທານຮ່ວມຂອງທ່ານ ປອ ນາງ ນິນປະເສີດ ໄຊຍະພອນສີ ຫົວໜ້າກົມພັດທະນາແມ່ຍິງລາວ ສູນກາງສະຫະພັນແມ່ຍິງລາວ ແລະ ທ່ານ ນາງ ມະນີວອນ ສາຍນໍ້າລິນ ຮອງປະທານສະຫະພັນແມ່ຍິງແຂວງເຊກອງ, ມີຕາງໜ້າຈາກກົມໂຄສະນາ ແລະ ວັດທະນາທໍາ ສສຍລ, ຄະນະຮັບຜິດຊອບຂັ້ນແຂວງ, ເມືອງ, ພະແນກຊັບພະຍາກອນທໍາມະຊາດ ແລະ ສິ່ງແວດລ້ອມແຂວງ, ພະແນກການເງິນແຂວງ, ຄະນະບໍລິຫານງານ ສຍ ແຂວງ, ຄະນະ ສຍ ຈາກເມືອງລະມາມ, ຫົວໜ້າຂະແໜງ, ຮອງຂະແໜງ, ຄະນະໜ່ວຍ ສຍ ອ້ອມຂ້າງແຂວງ ພ້ອມດ້ວຍສະມາຊິກແມ່ຍິງແຂວງ ເຂົ້າຮ່ວມ ທັງໝົດ 31 ທ່ານ, ຊາຍ 3 ທ່ານ.
ຜູ້ເຂົ້າຮ່ວມກອງປະຊຸມໄດ້ຮັບຟັງ ແລະ ແລກປ່ຽນບົດຮຽນກ່ຽວກັບກອບແຜນການປະຕິບັດງານບົດບາດຍິງ-ຊາຍ ທີ່ຕິດພັນກັບແມ່ຍິງໃນຂົງເຂດການປ່ຽນແປງດິນຟ້າອາກາດ, ຄວາມສໍາຄັນຂອງການເຊື່ອມບົດບາດຍິງ-ຊາຍ, ຮ່າງບົດລາຍງານການຄົ້ນຄ້ວາກ່ຽວກັບບົດບາດຍິງ-ຊາຍ ແລະ ການປ່ຽນແປງດິນຟ້າອາກາດ ແລະ ຜ່ານຮ່າງສາລະຄະດີກ່ຽວກັບການສ້າງຄວາມເຂັ້ມແຂງໃຫ້ແມ່ຍິງໃນການຄຸ້ມຄອງການປ່ຽນແປງດິນຟ້າອາກາດ. ກອງປະຊຸມຄັ້ງນີ້ໄດ້ຮັບທຶນສະໜັບສະໜູນໂດຍກອງທຶນປົກປັກຮັກສາສິ່ງແວດລ້ອມ, ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ.