ໂທລະສັບ 021 316253

ກອງປະຊຸມປະເມີນກົດໝາຍວ່າດ້ວຍການພັດທະນາ ແລະ ປົກປ້ອງແມ່ຍິງ ແລະ ກົດໝາຍວ່າດ້ວຍສະຫະພັນແມ່ຍິງລາວ

Jul 4, 2023 | ຂ່າວສານ ແລະ ກິດຈະກຳ

ວັນທີ 26 ມິຖຸນາ 2023​ ສູນກາງສະ​ຫ​ະພັນແມ່ຍິງ​ລາວ​ ໄດ້ສືບຕໍ່ຈັດກອງປະຊຸມປະເມີນກົດໝາຍວ່າດ້ວຍການພັດທະນາ ແລະ ປົກປ້ອງແມ່ຍິງ ແລະ ກົດໝາຍວ່າດ້ວຍສະຫະພັນແມ່ຍິງລາວ ໂດຍການເປັນປະທານຂອງ ທ່ານ ນາງ ສິລິກິດ ບຸບຜາ ຮອງປະທານຄະນະບໍລິຫານງານສູນກາງສະຫະພັນແມ່ຍິງລາວ; ມີຕາງໜ້າ ກະຊວງປ້ອງກັນປະເທດ,​ ສານພາກກາງ, ໄອຍະການພາກກາງ, ສານນະຄອນຫຼວງ,​ ໄອຍະການນະຄອນຫຼວງ, ກະຊວງປ້ອງກັນຄວາມສະຫງົບ,​ ຄະນະຈັດຕັ້ງສູນກາງພັກ,​ ຄະນະພົວພັນຕ່າງປະເທດສູນກາງພັກ,​ ສູນກາງແນວລາວສ້າງຊາດ,​ ສູນກາງສະຫະພັນກໍາມະບານລາວ,​ ສູນກາງຊາວໜຸ່ມປະຊາຊົນປະຕິວັດລາວ,​ ອົງການກາແດງລາວ,​ ມະຫາວິທະຍາໄລແຫ່ງຊາດ,​ ຄະນະໂຄສະນາອົບຮົມສູນກາງພັກ,​ ຄະນະສະຫະພັນແມ່ຍິງສຳນັກ ສສຍລ,​ ​ຄະນະຮັບຜິດຊອບ, ຊ່ຽວຊານໂຄງການອົງການ UNDP ພ້ອມດ້ວຍພະນັກງານທີ່ກ່ຽວຂ້ອງເຂົ້າຮ່ວມ.
ກອງປະຊຸມປະເມີນກົດໝາຍ 02 ສະບັບນີ້ ແມ່ນຈັດຕັ້ງປະຕິບັດຕາມກົດໝາຍ, ລະບຽບການ ວ່າດ້ວຍການສ້າງ ແລະ ປັບປຸງນິຕິກໍາ ຊຶ່ງໃນນີ້ພາຍໃຕ້ການຊີ້ນໍາ-ນໍາພາຂອງຄະນະນໍາສູນກາງສະຫະພັນແມ່ຍິງລາວ ໄດ້ປະຕິບັດຮູບແບບດຽວກັນ ທຸກແຂວງໃນຂອບເຂດທົ່ວປະເທດ, ຢູ່ບັນດາແຂວງແມ່ນສຳເລັດແລ້ວ. ດັ່ງນັ້ນ, ການຈັດກອງປະຊຸມປະເມີນໃນຄັ້ງນີ້ ແມ່ນເພື່ອໃຫ້ຜູ້ເຂົ້າຮ່ວມ ໂດຍສະເພາະ ແມ່ນຂົງເຂດ ປກສ, ປກຊ ແລະ​ ອົງການພາຄີພັກ ໄດ້ປະກອບຄໍາຄິດເຫັນຕໍ່ກັບການປະເມີນກົດໝາຍທັງ 02 ສະບັບນີ້, ຊຶ່ງບັນດາຄໍາຄິດເຫັນດັ່ງກ່າວ ຈະເປັນຂໍ້ມູນໃຫ້ຄະນະຮັບຜິດຊອບປັບປຸງກົດໝາຍ ເພື່ອເຮັດໃຫ້ກົດໝາຍທັງ 02 ສະບັບໄດ້ຮັບການປັບປຸງ ເພື່ອນໍາໃຊ້ເຂົ້າໃນການພັດທະນາ, ການສົ່ງເສີມຄວາມກ້າວໜ້າ ແລະ ການປົກປ້ອງສິດຜົນປະໂຫຍດອັນຊອບທໍາຂອງແມ່ຍິງ ຕາມລະບົບແຫ່ງການຄຸ້ມຄອງລັດ-ຄຸ້ມຄອງສັງຄົມດ້ວຍກົດໝາຍ. ພາຍຫຼັງສໍາເລັດການປະເມີນການ ເກັບກໍາຄໍາຄິດຄໍາເຫັນ ຈາກທົ່ວປະເທດແລ້ວ ຈະໄດ້ມີການປຶກສາຫາລືກັນຕື່ມພາຍຫຼັງກົດໝາຍໄດ້ຮັບການປັບປຸງ ເພື່ອຜ່ານ, ປ້ອງກັນ ຫຼື ອະທິບາຍຊີ້ແຈງ ດ້ວຍເຫດ ແລະ ຜົນ ພ້ອມທັງເອກະພາບ ກ່ອນເຂົ້າຜ່ານສະພາແຫ່ງຊາດຮັບຮອງໃນກອງປະຊຸມສະພາແຫ່ງຊາດ ຕາມແຜນການທີ່ວາງໄວ້ ແມ່ນທ້າຍປີ 2024-2025.