ກອງປະຊຸມຊຸກຍູ້, ຕິດຕາມວຽກງານການສ້າງພະນັກງານນໍາພາ-ຄຸ້ມຄອງເພດຍິງ, ວາລະແຫ່ງຊາດ ແລະ ປະເມີນກົດໝາຍໃນຄວາມຮັບຜິດຊອບຂອງສະຫະພັນແມ່ຍິງລາວ ຈັດຂຶ້ນໃນ ວັນທີ 28 ເມສາ 2023, ທີ່ຫ້ອງປະຊຸມຂອງ ຫ້ອງວ່າການແຂວງອຸດົມໄຊ, ໂດຍການເປັນປະທານຂອງທ່ານ ນາງ ລາວັນ ສຸດທິສານ ຮອງປະທານຄະນະບໍລິຫານງານສູນກາງສະຫະພັນແມ່ຍິງລາວ, ມີຄະນະປະທານສະຫະພັນແມ່ຍິງແຂວງ, ສະມາຊິກສະຫະພັນແມ່ຍິງ ຄະນະຈັດຕັ້ງ, ສານປະຊາຊົນ, ຂະແໜງຍຸດຕິທຳ, ພະແນກພາຍໃນ, ປກສ, ປກຊ, ແນວລາວສ້າງຊາດ ແລະ ຂະແໜງການອ້ອມຂ້າງແຂວງເຂົ້າຮ່ວມທັງໝົດ 51 ທ່ານ ຊາຍ 10 ທ່ານ. ກອງປະຊຸມໄດ້ຮັບຟັງລາຍງານຄວາມເປັນມາ ແລະ ສະພາບການຈັດຕັ້ງປະຕິບັດກົດໝາຍວ່າດ້ວຍ ສະຫະພັນແມ່ຍິງລາວ ແລະ ກົດໝາຍ ວ່າດ້ວຍ ການພັດທະນາ ແລະ ປົກປ້ອງແມ່ຍິງ ເຊິ່ງຜູ້ເຂົ້າຮ່ວມໄດ້ພ້ອມກັນປະກອບຄໍາຄິດ ຄໍາເຫັນໃສ່ກົດໝາຍທັງສອງສະບັບ ເພື່ອເຮັດໃຫ້ກົດໝາຍດັ່ງກ່າວມີເນື້ອໃນຄົບຖ້ວນ, ສົມບູນ ແລະ ສອດຄ່ອງກັບສະພາບ ໃນແຕ່ລະໄລຍະ.
ຈາກນັ້ນ ທ່ານຮອງປະທານ ສສຍລ ໄດ້ເຮັດວຽກຮ່ວມກັບ ຫົວໜ້າຄະນະຈັດຕັ້ງແຂວງ, ຜູ້ຕ່າງໜ້າຈາກສະພາປະຊາຊົນແຂວງ ແລະ ຄະນະບໍລິຫານງານສະຫະພັນແມ່ຍິງແຂວງ ເພື່ອຮັບຟັງການລາຍງານການຜັນຂະຫຍາຍມະຕິກອງປະຊຸມ ປຶກສາຫາລືວຽກງານສ້າງພະນັກງານນຳພາ-ຄຸ້ມຄອງເພດຍິງຄັ້ງທີ III ທັງເປັນການກະກຽມບຸກຄະລາກອນເພດຍິງໃຫ້ແກ່ກອງປະຊຸມໃຫຍ່ 3 ຂັ້ນ ຂອງພັກ ແລະ ຂອງສະຫະພັນແມ່ຍິງໃນຕໍ່ໜ້າໃຫ້ບັນລຸເປົ້າໝາຍທີ່ວາງໄວ້, ປະເມີນການຈັດຕັ້ງປະຕິບັດວາລະແຫ່ງຊາດ ແລະ ສ້າງການຫັນປ່ຽນຢ່າງເເຂງແຮງທຸກຂອດວຽກງານພະນັກງານ.
