ກອງປະຊຸມຊຸກຍູ້, ຕິດຕາມວຽກງານການສ້າງພະນັກງານນຳພາ-ຄຸ້ມຄອງເພດຍິງ, ວາລະແຫ່ງຊາດ, ການປະເມີນກົດໝາຍໃນຄວາມຮັບຜິດຊອບຂອງສະຫະພັນແມ່ຍິງລາວ ທີ່ແຂວງສາລະວັນ ຈັດຂຶ້ນໃນວັນທີ 27 ເມສາ 2023, ກ່າວເປີດ ແລະ ເປັນປະທານໂດຍ ທ່ານ ນາງ ອິນລາວັນ ແກ້ວບຸນພັນ ກຳມະການສູນກາງພັກ ປະທານຄະນະບໍລິຫານງານ ສສຍລ; ເຂົ້າຮ່ວມໂດຍ ທ່ານ ນາງ ບຸນທະວີ ດວງລາສີ ຮອງເລຂາພັກແຂວງ ຜູ້ຊີ້ນຳວຽກງານການເມືອງ-ແນວຄິດ, ວຽກພັກພະນັກງານ, ຄະນະປະຈຳພັກແຂວງ; ມີຄະນະປະທານສະຫະພັນແມ່ຍິງແຂວງ, ສະມາຊິກແມ່ຍິງ, ຂະແໜງຍຸຕິທຳ, ສະພາປະຊາຊົນແຂວງ, ປກສ, ປກຊ, ແນວລາວສ້າງຊາດ ແລະ ຂະແໜງການອ້ອມຂ້າງແຂວງເຂົ້າຮ່ວມທັງໝົດ 78 ທ່ານ, ຊາຍ 7 ທ່ານ. ກອງປະຊຸມໄດ້ຮັບຟັງການນຳສະເໜີການຈັດຕັ້ງປະຕິບັດກົດໝາຍວ່າດ້ວຍສະຫະພັນແມ່ຍິງລາວ ແລະ ກົດໝາຍວ່າດ້ວຍການພັດທະນາ ແລະ ປົກປ້ອງແມ່ຍິງ, ສະເໜີຄຳຖາມເຈາະຈີ້ມກ່ຽວກັບການຈັດຕັ້ງປະຕິບັດວ່າດ້ວຍການພັດທະນາ ແລະ ປົກປ້ອງແມ່ຍິງ ຊຶ່ງຜູ້ເຂົ້າຮ່ວມໄດ້ປະກອບຄຳຄິດເຫັນໃສ່ກົດໝາຍທັງສອງສະບັບຢ່າງພ້ອມພຽງ ເພື່ອໃຫ້ມີເນື້ອໃນຄົບຖ້ວນ ແລະ ສົມບູນ.
ຈາກນັ້ນ, ທ່ານປະທານ ສສຍລ ໄດ້ເຮັດວຽກຮ່ວມກັບການນຳຂັ້ນແຂວງ ເຂົ້າຮ່ວມໂດຍ ທ່ານນາງ ບຸນທະວີ ດວງລາສີ ຮອງເລຂາພັກແຂວງສາລະວັນ ຜູ້ຊີ້ນຳວຽກງານການເມືອງ-ແນວຄິດ, ວຽກພັກພະນັກງານ ມີຄະນະປະຈຳພັກແຂວງ, ຄະນະປະທານສະຫະພັນແມ່ຍິງແຂວງ, ສະພາແຂວງ ແລະ ຄະນະຈັດຕັ້ງແຂວງ, ຮອງຫົວໜ້າຫ້ອງການ, ຮອງຫົວໜ້າກົມ ຈາກ ສສຍລ ເຂົ້າຮ່ວມ. ໃນກອງປະຊຸມ, ຕາງໜ້າ ສສຍລ ໄດ້ລາຍງານຜົນກອງປະຊຸມປຶກສາຫາລືວຽກງານສ້າງພະນັກງານນໍາພາ-ຄຸ້ມຄອງເພດຍິງ ຄັ້ງທີ III; ລາຍງານການຈັດຕັ້ງປະຕິບັດວາລະແຫ່ງຊາດ ແລະ ການສ້າງການຫັນປ່ຽນຢ່າງແຂງແຮງທຸກຂອດວຽກພະນັກງານ ໃນຄວາມຮັບຜິດຊອບຂອງສູນກາງສະຫະພັນແມ່ຍິງລາວ ໄລຍະຜ່ານມາ. ຈາກນັ້ນ, ການນຳຂັ້ນແຂວງລາຍງານກ່ຽວກັບແຜນກໍານົດພະນັກງານນໍາພາ-ຄຸ້ມຄອງຂັ້ນສູງກາງຄຸ້ມຄອງ; ຂັ້ນແຂວງ, ນະຄອນຫຼວງຄຸ້ມຄອງ; ລາຍງານກ່ຽວກັບການສ້າງແຜນບໍາລຸງສ້າງ ແລະ ບັນຈຸຊັບຊ້ອນພະນັກງານນໍາພາ-ຄຸ້ມຄອງເພດຍິງໃນແຕ່ລະຕໍາແໜ່ງບໍລິຫານ ແລະ ໄດ້ປຶກສາຫາລືຮ່ວມກັນກ່ຽວກັບການບໍາລຸງສ້າງ ແລະ ແຜນຄາດຄະເນຈັດວາງສັບຊ້ອນພະນັກງານເພດຍິງໃນຕໍ່ໜ້າ. ພ້ອມດຽວກັນນີ້, ທ່ານປະທານຄະນະບໍລິການງານ ສສຍລ ໄດ້ມອບລຳໂພງ 1ໜ່ວຍ ແລະ ສະບູ ຊຶ່ງໄດ້ຮັບການສະໜັບສະໜູນຈາກໂຄງການກອງທຶນໂລກ ຜ່ານສູນກາງສະຫະພັນແມ່ຍິງລາວ ເພື່ອໝູນໃຊ້ເຂົ້າໃນການລົງໂຄສະນາເຜີຍແຜ່ຂໍ້ມູນຂ່າວສານເພື່ອປ້ອງກັນການແຜ່ລະບາດຂອງພະຍາດໂຄວິດ 19 ແລະ ວຽກງານອື່ນໆ ພາຍໃນແຂວງ.
