ກອງປະຊຸມຊຸກຍູ້, ຕິດຕາມວຽກງານພັດທະນາແມ່ຍິງ ແລະ ການຈັດຕັ້ງປະຕິບັດວາລະແຫ່ງຊາດຂອງສະຫະພັນແມ່ຍິງລາວ ຈັດຂຶ້ນໃນວັນທີ 22 ມິຖຸນາ 2022 ໂດຍການເປັນປະທານຂອງ ທ່ານ ນ. ອິນລາວັນ ແກ້ວບຸນພັນ ກຳມະການສູນກາງພັກ, ປະທານຄະນະບໍລິຫານງານ ສສຍລ, ມີຄະນະປະທານ ສສຍລ, ປະທານ ສຍ ບັນດາກະຊວງ-ອົງການ ແລະ ຄະນະຫ້ອງການ, ກົມ, ສູນ, ຫ້ອງການກອງເລຂາຄະນະກຳມາທິການແຫ່ງຊາດ ເພື່ອຄວາມກ້າວໜ້າຂອງແມ່ຍິງ ແລະ ແມ່-ເດັກ (ຄຊກມດ), ລັດວິສາຫະກິດຝ້າຍລາວເຂົ້າຮ່ວມທັງໝົດ 64 ຄົນ, ຍິງ 63 ຄົນ, ຊາຍ 1 ຄົນ.
ໃນກອງປະຊຸມຜູ້ເຂົ້າຮ່ວມໄດ້ຮັບຟັງການນໍາສະເໜີວຽກງານຂອງ ສສຍລ ແລະ ວຽກງານຂອງຫ້ອງການ, ກົມ, ສູນ ທີ່ຂຶ້ນກັບ ສສຍລ ເປັນຕົ້ນ: ແຜນພັດທະນາແມ່ຍິງແຫ່ງຊາດ 05 ປີ ຄັ້ງທີ VIII ແລະ ການຈັດຕັ້ງປະຕິບັດຂໍ້ແຂ່ງຂັນຮັກຊາດ ແລະ ພັດທະນາແມ່ຍິງລາວ, ວາລະແຫ່ງຊາດການສະກັດກັ້ນ ແລະ ແກ້ໄຂບັນຫາຢາເສບຕິດ, ວາລະແຫ່ງຊາດແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ, ການສ້າງການຫັນປ່ຽນຢ່າງແຂງແຮງ ແລະ ເລິກເຊິ່ງທຸກຂອດໃນວຽກງານພະນັກງານ; ການນໍາສະເໜີວຽກງານຫ້ອງການ ສສຍລ, ວຽກງານຈັດຕັ້ງ-ພະນັກງານ, ວຽກງານໂຄສະນາອົບຮົມ ແລະ ວັດທະນະທໍາ, ວຽກງານພັດທະນາແມ່ຍິງ, ວຽກງານກວດກາ, ວຽກງານສູນອົບຮົມແມ່ຍິງລາວ, ວຽກງານໃຫ້ຄໍາປຶກສາ ແລະ ປົກປ້ອງແມ່ຍິງ – ເດັກນ້ອຍ, ວຽກງານສູນຂໍ້ມູນຂ່າວສານ ແລະ ຫໍມູນເຊື້ອແມ່ຍິງລາວ, ວຽກງານແຜນການ ແລະ ການຮ່ວມມືຕ່າງປະເທດ ສສຍລ ແລະ ວຽກງານ ຄຊກມດ.
