ໂທລະສັບ 021 316253

ກອງປະຊຸມຄົບຄະນະເປີດກວ້າງ ຄຊກມດ ປະຈໍາປີ 2023

Nov 28, 2023 | ຂ່າວສານ ແລະ ກິດຈະກຳ

ໃນວັນທີ 22 ພະຈິກ 2023 ຄະນະກຳມາທິການແຫ່ງຊາດ ເພື່ອຄວາມກ້າວໜ້າຂອງແມ່ຍິງ ແລະ ແມ່-ເດັກ (ຄຊກມດ) ໄດ້ຈັດກອງປະຊຸມຄົບຄະນະເປີດກວ້າງ ຄະນະກຳມະທິການແຫ່ງຊາດ ເພື່ອຄວາມກ້າວໜ້າຂອງແມ່ຍິງ, ແມ່-ເດັກ ປະຈຳປີ 2023 ແບບເຊິ່ງໜ້າ ແລະ ແບບທາງໄກ ທີ່ ຫໍປະຊຸມແຫ່ງຊາດ ໃຫ້ກຽດກ່າວເປີດ-ປິດ ພິທີໂດຍ: ທ່ານ ສຈ. ປອ. ກິແກ້ວ ໄຂຄຳພິທູນ ຮອງນາຍົກລັດຖະມົນຕີ, ປະທານ ຄຊກມດ; ມີ ທ່ານ ນ. ອາລີ ວົງໜໍ່ບຸນທໍາ ປະທານຄະນະບໍລິຫານງານ ສສຍລ, ຮອງປະທານ ຜູ້ປະຈໍາການ ຄຊກມດ, ຄະນະຄຊກມດ, ພ້ອມດ້ວຍ ປະທານ ຄກມດ ກະຊວງ-ອົງການ, ນະຄອນຫຼວງວຽງຈັນ ແລະ ຕາງໜ້າຈາກພາກສ່ວນກ່ຽວຂ້ອງເຂົ້າຮ່ວມ.
ການຈັດກອງປະຊຸມໃນຄັ້ງນີ້ທ່ານປະທານຄະນະບໍລິຫານງານ ສສຍລ ໄດ້ລາຍງານຫຍໍ້ວຽກງານທີ່ພົ້ນເດັ່ນກາງສະໄໝ(2021-2025) ແລະ ທິດທາງແຜນການ ປີ 2025 ຂອງຄຊກມດ ແລະ ຮັບຟັງການລາຍງານຫຍໍ້ຜົນການຈັດຕັ້ງປະຕິບັດມະຕິກອງປະຊຸມຄົບຄະນະເປີດກວ້າງປະຈຳປີ 2022; ພ້ອມດຽວກັນນີ້ຜູ້ເຂົ້າຮ່ວມໄດ້ພ້ອມກັນປຶກສາຫາລືໃສ່ຮ່າງບົດລາຍ ແລະ ຮ່ວມກັນວາງທິດທາງແຜນການໃນຕໍ່ໜ້າເຊິ່ງສາມາດສະຫຼຸບ ແລະ ຜ່ານຮ່າງມະຕິຕົກລົງເປັນເອກະພາບກັນຄືດັ່ງນີ້:
1. ກອງປະຊຸມໄດ້ຄົ້ນຄວ້າຢ່າງເລິກເຊິ່ງຢ່າງກົງໄປກົງມາ ແລະ ຮັບຮອງເອົາແຜນການຈັດຕັ້ງປະຕິດວຽກງານແຜນການ 5 ປີ (2021-2025) ແລະ ທິດທາງແຜນການທ້າຍສະໄໝທ້າຍປີ 2025 ຂອງ ຄຊກມດ.
2. ເຫັນດີເປັນເອກະພາບກ່ຽວກັບນິຕິກຳການຈັດຕັ້ງ ແລະ ການເຄື່ອນໄຫວຂອງ ຄຊກມດ ແລະ ຄກມດ ແລະ ເສນາທິການຊ່ວຍວຽກປ່ຽນແທນສະບັບເກົ່າ ເພື່ອເປັນບ່ອນອີງໃຫ້ແຕ່ລະຂັ້ນປັບປຸງການຈັດຕັ້ງໃນການເຄື່ອນໄຫວວຽກງານຂອງຕົນໃຫ້ສຳເລັດ.
3. ໃຫ້ບັນດາ ຄກມດ ບັນດາຂະແໜງການ ແລະ ທ້ອງຖິ່ນ ເປັນເຈົ້າການຊີ້ນຳຄະນະ ຄກມດ ຂັ້ນຂອງຕົນ; ເຊື່ອມສານວຽກງານຄວາມສະເໝີພາບຍິງ-ຊາຍ ແລະ ວຽກງານອື່ນໆ ພ້ອມທັງຊຸກຍູ້ຕິດຕາມກວດກາ ແລະ ລາຍງານ ຄຊກມດ ເປັນປົກກະຕິ.
4. ຄຊກມດ; ຄກມດ ບັນດາຂະແໜງການ ແລະ ທ້ອງຖິ່ນ ເປັນເຈົ້າການຊີ້ນຳສະຫຼຸບກາງສະໄໝການຈັດຕັ້ງປະຕິບັດແຜນດຳເນີນງານແຫ່ງຊາດເພື່ອຄວາມສະເໝີພາບຍິງ-ຊາຍ; ແຜນດຳເນີນງານແຫ່ງຊາດ ເພື່ອແມ່ ແລະເດັກ ແລະ ແຜນດຳເນີນງານແຫ່ງຊາດເພື່ອລຶບລ້າງຄວາມຮຸນແຮງຕໍ່ແມ່ຍິງ ແລະ ຄວາມຮຸນແຮງຕໍ່ເດັກໃຫ້ສຳເລັດ; ພ້ອມດຽວກັນນີ້ໃຫ້ປັບປຸງບົດລາຍງານທຸກ3 ເດືອນ 6 ເດືອນ ແລະ 1 ປີ ມອບໃຫ້ ຄຊກມດ ກຳນົດລະອຽດກ່ຽວກັບວິທີການເຄື່ອງມືແລະກຳນົດໃນການລາຍງານ ແລ້ວແຈ້ງໃຫ້ ຄກມດ ຈັດຕັ້ງປະຕິບັດຢ່າງເຂັ້ມງວດ.
5. ມອບໃຫ້ ຄຊກມດ ປະສານສົບທົບກັບ ຄກມດ ເພື່ອປຶກສາຫາລືກະກຽມຕອບຄຳຖາມເຈາະຈີ້ມຂອງຄະນະກຳມາທິການຊີດໍສາກົນຕໍ່ບົດລາຍແຫ່ງຊາດປະຈຳໄລຍະທີ10 ໃນການຈັດຕັ້ງປະຕິບັດສົນທິສັນຍາຊີດໍໃນ ສປປ ລາວ.
6. ສືບຕໍ່ປັບປຸງບົດລາຍງານແຫ່ງຊາດປະຈຳໄລຍະທີ 7 ກ່ຽວກັບການຈັດຕັ້ງສົນທິສັນຍາຊີດໍ ກ່ຽວກັບສິດທິເດັກຢູ່ໃນ ສປປ ລາວ ໃຫ້ສຳເລັດ.
7. ມອບໃຫ້ ຄກມດ ອົງການ, ແຂວງ ສືບຕໍ່ໂຄສະນາເຜີຍແຜ່ ແລະ ປູກຈິດສຳນຶກກ່ຽວກັບການສົ່ງເສີມຄວາມກ້າວໜ້າຂອງແມ່ຍິງ ແລະ ແມ່-ເດັກ; ການຕ້ານ ແລະ ສະກັດກັ້ນການໃຊ້ຄວາມຮຸນແຮງຕໍ່ແມ່ຍິງ ແລະເດັກ, ສົນທິສັນຍາວ່າດ້ວຍການລຶບລ້າງທຸກການຈຳແນກຕໍ່ແມ່ຍິງ ແລະ ສົນທິສັນຍາວ່າດ້ວຍສິດທິເດັກ ແລະ ສອງອານຸສັນຍາເພີ່ມເຕີມວ່າດ້ວຍສິດທິເດັກໃຫ້ກວ້າງຂວາງແລະ ເລິກເຊິ່ງກວ່ຢາເກົ່າ.
8. ມອບໃຫ້ ຫ້ອງການ ຄຊກມດ ສືບຕໍ່ສ້າງຄວາມເຂັ້ມແຂງໃຫ້ ຄກມດ ແລະ ເສນາທິການຊ່ວຍວຽກແຕ່ລະຂັ້ນ ໃນການຈັດຕັ້ງປະຕິບັດວຽກຄວາມກ້າວໜ້າຂອງແມ່ຍິງ, ແມ່ ແລະ ເດັກ.
9. ມອບໃຫ້ ຄກມດ ແຕ່ລະກະຊວງ-ອົງການ ແຂວງ ແລະ ນະຄອນຫຼວງ ນຳເອົາຜົນກອງປະຊຸມໄປເຜີຍແຜ່ ແລະ ຈັດຕັ້ງປະຕິບັດໃຫ້ບັນລຸຜົນສຳເລັດ ແລະ ສະຫຼຸບລາຍງານ ເປັນປົກກະຕິ.