ກອງປະຊຸມຄົບຄະນະບໍລິຫານງານພັກ ສູນກາງສະຫະພັນແມ່ຍິງລາວເປີດກວ້າງ ປະຈຳໄຕມາດ II/2024 ຈັດຂຶ້ນໃນວັນທີ 2 ກໍລະກົດ 2024 ໂດຍການເປັນປະທານຂອງ ສະຫາຍນາງ ອາລີ ວົງໜໍ່ບຸນທໍາ ກໍາມະການສູນກາງພັກ ເລຂາຄະນະພັກ, ປະທານຄະນະບໍລິຫານງານ ສສຍລ; ມີຄະນະພັກ ຄະນະປະທານສສຍລ, ເລຂາໜ່ວຍພັກ, ຄະນະໜ່ວຍພັກ ຄະນະກົມ, ສູນ, ຫ້ອງການຄະນະກຳມາທິການແຫ່ງຊາດ ເພື່ອສົ່ເສີມຄວາມກ້າວໜ້າຂອງແມ່ຍິງ, ແມ່ ແລະ ເດັກ (ຄຊກມດ), ສະຖາບັນການເງິນຈຸລະພາກ ທີ່ຮັບເງິນຝາກເພື່ອພັດທະນາແມ່ຍິງ ແລະ ຄອບຄົວ, ພ້ອມດ້ວຍຄະນະບໍລິຫານງານ 3 ອົງການຈັດຕັ້ງມະຫາຊົນຂອງ ສສຍລ ເຂົ້າຮ່ວມຢ່າງພ້ອມພຽງ.
ຜູ້ເຂົ້າຮ່ວມກອງປະຊຸມໄດ້ຮັບຟັງການຜ່ານບົດສະຫຼຸບການນຳພາ-ຊີ້ນຳການເຄື່ອນໄຫວວຽກງານຮອບດ້ານຂອງອົງຄະນະພັກ ປະຈຳໄຕມາດ II ແລະ ແຜນການປະຈໍາໄຕມາດ III/2024 ຈາກ ທ່ານ ນາງ ເຫຼັກ ແສນຄໍາວົງສາ ກຳມະການປະຈຳພັກ ເລຂາໜ່ວຍພັກກົມຈັດຕັ້ງ-ພະນັກງານ; ຮັບຟັງການລາຍງານສະພາບສະມາຊິກພັກ, ພະນັກງານ-ລັດຖະກອນຂອງແຕ່ລະໜ່ວຍພັກ ຈາກຄະນະໜ່ວຍພັກຂອງກົງຈັກຊ່ວຍວຽກ ສສຍລ; ຮັບຟັງການລາຍງານຫຍໍ້ການສັງລວມແຜນຄາດຄະເນຈັດກອງປະຊຸມ ຮາກຖານ 3 ອົງການຈັດຕັ້ງມະຫາຊົນ ສສຍລ; ຮັບຟັງການເຜີຍແຜ່ມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 8 ສະໄໝທີ XI ພ້ອມທັງຮັບຟັງຄຳເຫັນໂອ້ລົມຈາກເລຂາຄະນະພັກ ສສຍລ ເພື່ອເປັນທິດທາງໃນການປະຕິບັດວຽກງານໃນຕໍ່ໜ້າໃຫ້ບັນລຸຜົນສຳເລັດຕາມລະດັບຄາດໝາຍທີ່ວາງໄວ້.
