ໂທລະສັບ 021 316253

ກອງປະຊຸມຄົບຄະນະບໍລິຫານງານກາງສະໄໝ ສູນກາງສະຫະພັນແມ່ຍິງລາວ ຄັ້ງທີ 3 ສະໄໝທີ VIII

Dec 13, 2023 | ຂ່າວສານ ແລະ ກິດຈະກຳ

ກອງປະຊຸມຄົບຄະນະບໍລິຫານງານກາງສະໄໝ ສູນກາງສະຫະພັນແມ່ຍິງລາວ ຄັ້ງທີ 3 ສະໄໝທີ VIII ຈັດຂຶ້ນ ໃນວັນທີ 5 ທັນວາ 2023, ພາຍໃຕ້ການເປັນປະທານຂອງ ທ່ານ ນາງ ອາລີ ວົງໜໍ່ບຸນທໍາ ກຳມະການສູນກາງພັກ ເລຂາຄະນະບໍລິຫານງານພັກ ປະທານຄະນະບໍລິຫານງານ ສສຍລ; ເຂົ້າຮ່ວມມີ ທ່ານຮອງປະທານສູນກາງແນວລາວສ້າງຊາດ, ທ່ານປະທານສູນກາງສະຫະພັນກຳມະບານລາວ, ອົງການພາຄີ, ຄະນະບໍລິຫານງານສູງກາງສະຫະພັນແມ່ຍິງລາວ ສະໄໝທີ VIII, ບັນດາທ່ານຮອງປະທານສູນກາງສະຫະພັນແມ່ຍິງລາວ, ປະທານ, ຮອງປະທານສະຫະພັນແມ່ຍິງບັນດາກະຊວງ, ອົງການ, ແຂວງ ແລະ ນະຄອນຫຼວງວຽງຈັນ ແລະ ແຂກຖືກເຊີນເຂົ້າຮ່ວມ.
ກອງປະຊຸມໄດ້ຮັບຟັງການຜ່ານຮ່າງບົດສະຫຼຸບຕີລາຄາການຈັດຕັ້ງປະຕິບັດວຽກງານກາງສະໄໝ ແລະ ວາງທິດທາງແຜນການທ້າຍສະໄໝ; ຜ່ານຮ່າງບົດສະຫຼຸບການຈັດຕັ້ງຜັນຂະຫຍາຍມະຕິກອງປະຊຸມຄົບຄະນະບໍລິຫານງານສູນກາງສະຫະພັນແມ່ຍິງລາວ ຄັ້ງທີ 2 ສະໄໝທິ VIII; ຜ່ານຮ່າງບົດສະຫຼຸບການຈັດຕັ້ງປະຕິບັດແຜນພັດທະນາແມ່ຍິງແຫ່ງຊາດກາງສະໄໝ, ການຈັດຕັ້ງປະຕິບັດ 2 ວາລະແຫ່ງຊາດ; ສະຫຼຸບຕີລາຄາ, ຖອດຖອນບົດຮຽນການປະຕິບັດຄໍາຂວັນ, ຂໍ້ແຂ່ງຂັນ 3 ດີ ແລະ ການສ້າງຄອບຄົວ ແລະ ບ້ານແມ່ຍິງ 3 ດີ ຕິດພັນກັບການສ້າງບ້ານພັດທະນາຕາມທິດ 3 ສ້າງ; ຜ່ານຮ່າງບົດສະຫຼຸບການເຄື່ອນໄຫວຊຸກຍູ້ວຽກງານສ້າງພະນັກງານນໍາພາ-ຄຸ້ມຄອງເພດຍິງ ແລະ ແຜນການກະກຽມກອງປະຊຸມຄະນະພັກ 3 ຂັ້ນ ແລະ ສະຫະພັນແມ່ຍິງຂັ້ນທ້ອງຖິ່ນ; ຜ່ານຮ່າງມາດຖານເງື່ອນໄຂນາມມະຍົດແມ່ຍິງດີເດັ່ນ; ສະຫຼຸບຖອດຖອນບົດຮຽນກ່ຽວກັບການຝຶກອົບຮົມວິຊາຊີບ, ການຈັດຕັ້ງປະຕິບັດວຽກງານໃຫ້ຄໍາປຶກສາ ແລະ ປົກປ້ອງແມ່ຍິງ-ເດັກນ້ອຍ, ການຈັດຕັ້ງປະຕິບັດວຽກງານຫ້ອງການ ຄຊກມດ; ຜ່ານຮ່າງໂຄງຮ່າງລາຍງານການເມືອງ ແລະ ຮ່າງທິດທາງແຜນການ 5 ປີ (2026-2030) ຂອງສະຫະພັນແມ່ຍິງລາວ ເພື່ອກຽມໃຫ້ແກ່ກອງປະຊຸມໃຫຍ່ຜູ້ແທນແມ່ຍິງລາວທົ່ວປະເທດຄັ້ງທີ IX ແລະ ສະເໜີແນວຄວາມຄິດໃນການສ້າງແຜນພັດທະນາແມ່ຍິງແຫ່ງຊາດ ຄັ້ງທີ IX (2026-2030).
ພ້ອມນີ້, ກອງປະຊຸມໃນຄັ້ງນີ້ຍັງຈະດຳເນີນຊີວິດການເມືອງຂອງ ຄະນະບໍລິຫານງານສູນກາງສະຫະພັນແມ່ຍິງລາວ ສະໄໝທີ VIII ເພື່ອສະຫຼຸບຕີລາຄາແບບແຜນວິທີນໍາພາ, ວິທີເຮັດວຽກຂອງຄະນະບໍລິຫານງານ ແລະ ພ້ອມກັນປຶກສາຫາລືວຽກງານປິ່ນອ້ອມອື່ນໆ.
ກອງປະຊຸມຈະດຳເນີນເປັນເວລາ 2 ວັນ (5-6 ທັນວາ 2023).