ວັນທີ 12 ພຶດສະພາ 2023, ຢູ່ທີ່ຫ້ອງປະຊຸມສູນກາງສະຫະພັນແມ່ຍິງລາວ ຈັດກອງປະຊຸມຄົບຄະນະກາງສະໄໝ ຂອງໜ່ວຍພັກຮາກຖານກົມກວດກາ ສູນກາງສະຫະພັນແມ່ຍິງລາວ, ໂດຍການເຂົ້າຮ່ວມ ແລະ ເປັນປະທານຂອງ ສະຫາຍ ນາງ ອິນລາວັນ ແກ້ວບຸນພັນ ກຳມະການສູນກາງພັກ ເລຂາຄະນະພັກ ປະທານຄະນະບໍລິຫານງານສູນກາງສະຫະພັນແມ່ຍິງລາວ; ມີຄະນະພັກ, ຄະນະປະຈຳພັກ, ຄະນະຕິດຕາມ-ຊຸກຍູ້ກອງປະຊຸມ, ຄະນະໜ່ວຍພັກ ພ້ອມດ້ວຍສະມາຊິກພັກກົມກວດກາ ເຂົ້າຮ່ວມທັງໝົດ 16ສະຫາຍ, ຊາຍ 01 ສະຫາຍ. ໃນກອງປະຊຸມ ສະຫາຍ ນາງ ພູຄຳ ຄັດສະຫວ່າງ ເລຂາໜ່ວຍພັກກົມກວດກາ ໄດ້ຜ່ານຮ່າງບົດສະຫຼຸບຕີລາການຈັດຕັ້ງປະຕິບັດມະຕິກອງປະຊຸມໃຫຍ່ຂອງໜ່ວຍພັກ ຕິດພັນກັບການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກ ແລະ ຄັ້ງທີ IV ຂອງອົງຄະນະພັກສູນກາງສະຫະພັນແມ່ຍິງລາວ ໂດຍໄດ້ຖືເອົາວຽກງານສຶກສາອົບຮົມການເມືອງ-ແນວຄິດເປັນກົກ; ຖືສຳຄັນ ແລະ ເອົາໃຈໃສ່ຕໍ່ວຽກງານກໍ່ສ້າງພັກທາງດ້ານທິດສະດີການເມືອງ, ວິຊາສະເພາະ, ວິຊາການຕ່າງໆ ດ້ວຍການນຳພາເຂົ້າຮ່ວມເຊື່ອມຊຶມແນວທາງແຜນນະໂຍບາຍ, ມະຕິ-ຄຳສັ່ງຂອງພັກ, ກົດໝາຍ, ກົດລະບຽບຕ່າງໆ ຂອງລັດ, ມູນເຊື້ອຂອງພັກ, ຂອງຊາດ; ຄຸນລັກສະນະທີ່ເປັນມູນເຊື້ອຂອງແມ່ຍິງລາວ. ຈາກນັ້ນ ສະຫາຍ ນາງ ທອງສີ ຍອຍສາຍຄຳ ຮອງເລຂາໜ່ວຍພັກ ໄດ້ຜ່ານຮ່າງບົດສຳຫຼວດການນຳພາລວມຂອງໜ່ວຍພັກຮາກຖານກົມກວດກາ. ຫຼັງຈາກນັ້ນ ໄດ້ດຳເນີນການທາບທາມ ແລະ ປະເມີນພະນັກງານນໍາພາ-ຄຸ້ມຄອງຕື່ມອີກ.
ໂອກາດນີ້ສະຫາຍ ນາງ ອິນລາວັນ ແກ້ວບຸນພັນ ໄດ້ມີຄຳເຫັນໂອ້ລົມ ໂດຍສະຫາຍໄດ້ເນັ້ນໜັກໃຫ້ຄະນະໜ່ວຍພັກ-ສະມາຊິກພັກທຸກສະຫາຍ ພ້ອມກັນຈັດຕັ້ງປະຕິບັດວຽກງານທີ່ເຫັນວ່າຍັງຄົງຄ້າງ, ເສີມຂະຫຍາຍດ້ານດີ, ສືບຕໍ່ປັບປຸງດ້ານອ່ອນຂໍ້ຄົງຄ້າງໃຫ້ສຳເລັດເປັນກ້າວໆ, ສືບຕໍ່ເອົາໃຈໃສ່ແກ້ໄຂວຽກງານທີ່ຍັງຄົງຄ້າງ, ເພື່ອເປັນບ່ອນອິງໃນການສືບຕໍ່ຈັດຕັ້ງປະຕິບັດວຽກງານທ້າຍສະໄໝໃຫ້ໄດ້ຮັບຜົນດີເທື່ອລະກ້າວ.
