ຕອນເຊົ້າວັນທີ 17 ກໍລະກົດ 2023, ກອງປະຊຸມຄົບຄະນະກາງສະໄໝ ຂອງຄະນະບໍລິຫານງານພັກສູນກາງສະຫະພັນແມ່ຍິງລາວ ສະໄໝທີ IV ໄດ້ໄຂຂຶ້ນຢ່າງເປັນທາງການ ໂດຍການເປັນປະທານຂອງ ສະຫາຍ ປອ. ບຸນທອງ ຈິດມະນີ ກໍາມະການກົມການເມືອງສູນກາງພັກ, ຜູ້ປະຈຳການຄະນະເລຂາທິການສູນກາງພັກ, ຮອງປະທານປະເທດ ແຫ່ງ ສປປ ລາວ, ມີ ສະຫາຍ ນາງ ອິນລາວັນ ແກ້ວບຸນພັນ ກໍາມະການສູນກາງພັກ, ເລຂາຄະນະບໍລິຫານພັກສູນກາງສະຫະພັນແມ່ຍິງລາວ, ປະທານຄະນະບໍລິຫານງານສູນກາງສະຫະພັນແມ່ຍິງລາວ, ສະຫາຍຮອງເລຂາຄະນະບໍລິຫານພັກ ສສຍລ, ຄະນະຮັບຜິດຊອບຈາກສູນກາງພັກ ແລະ ສະຫາຍເລຂາ, ຮອງເລຂາໜ່ວຍພັກ, ຄະນະໜ່ວຍພັກຂອງກົງຈັກຊ່ວຍວຽກ ສສຍລ ເຂົ້າຮ່ວມ. ໃນກອງປະຊຸມໄດ້ພ້ອມກັນເຊື່ອມຊືມ ບັນດາມະຕິຄໍາສັ່ງຂອງຄະນະເລຂາທິການສູນກາງພັກ, ຄຳແນະນຳວ່າດ້ວຍການດຳເນີນກອງປະຊຸມຄົບຄະນະກາງສະໄໝຂອງຄະນະບໍລິຫານງານພັກແຕ່ລະຂັ້ນ, ລວມທັງບັນດາຂໍ້ຫ້າມຂອງສະມາຊິກພັກ, ໄດ້ຕີລາຄາ ແລະ ທາບທາມ ຄວາມໄວ້ວາງໃຈຕໍ່ການນໍາພາລວມ ແລະ ບຸກຄົນໃນຄະນະພັກອົງຄະນະພັກຂອງສູນກາງສະຫະພັນແມ່ຍິງລາວ, ໄດ້ຮັບຟັງການລາຍງານຮ່າງບົດສະຫຼຸບຕີລາຄາການຈັດຕັ້ງປະຕິບັດມະຕິກອງປະຊຸມໃຫຍ່ສະມາຊິກພັກ ຄັ້ງທີ IV ກາງສະໄໝຂອງອົງຄະນະພັກສູນກາງສະຫະພັນແມ່ຍິງລາວ ຕິດພັນກັບມະຕິ XI ຂອງພັກ, ການຈັດຕັ້ງປະຕິບັດແຜນພັດທະນາແມ່ຍິງ ແລະ ການປະຕິບັດວາລະແຫ່ງຊາດ, ການສ້າງຫັນປ່ຽນຢ່າງແຂງແຮງໃນທຸກຂອດພະນັກງານ. ພ້ອມກັນນັ້ນ, ຍັງຈະໄດ້ດຳເນີນກອງປະຊຸມພາຍໃນຄົບຄະນະບໍລິຫານງານພັກກາງສະໄໝຂອງສູນກາງສະຫະພັນແມ່ຍິງລາວ ເພື່ອສຳຫຼວດກວດກາ ແລະ ຕີລາຄາການນຳພາ-ຊີ້ນຳລວມຂອງອົງຄະນະພັກ ແລະ ບັນດາສະຫາຍໃນຄະນະພັກຕາມສິດ, ພາລະບົດບາດ, ໜ້າທີ່ ແລະ ຄວາມຮັບຜິດຊອບ, ທີ່ກວມເອົາດ້ານດີທີ່ເປັນພື້ນຖານ, ດ້ານອ່ອນ ຂໍ້ຄົງຄ້າງ, ສາເຫດ ແລະ ບົດຮຽນທີ່ຖອດຖອນໄດ້ຈາກພຶດຕິກໍາຕົວຈິງຢ່າງພາວະວິໄສ, ຕໍ່ຜົນສໍາເລັດການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ IV ຂອງອົງຄະນະພັກສູນກາງສະຫະພັນແມ່ຍິງລາວ, ນັບແຕ່ກອງປະຊຸມໃຫຍ່ສຳເລັດ ໃນ ເດືອນມີນາ 2022 ເຖິງ ເດືອນມິຖຸນາ 2023 (ລວມໄລຍະເວລາ 1ປີ ກັບ 3 ເດືອນ). ໃນໂອກາດດັ່ງກ່າວ, ສະຫາຍ ປອ. ບຸນທອງ ຈິດມະນີ ກໍາມະການກົມການເມືອງສູນກາງພັກ, ຜູ້ປະຈຳການຄະນະເລຂາທິການສູນກາງພັກ, ຮອງປະທານປະເທດ ແຫ່ງ ສປປ ລາວ ໄດ້ມີຄໍາເຫັນຊີ້ນໍາຕໍ່ການທາບທາມບາງຕອນວ່າ: ບັນດາມາດຖານເງື່ອນໄຂ ແລະ ຂໍ້ຫ້າມສໍາລັບສະມາຊິກພັກ ແມ່ນພື້ນຖານທີ່ສະມາຊິກພັກຈະຕ້ອງສູ້ຊົນ ບຸກບືນ, ປັບປຸງ ແລະ ຝຶກຝົນຫຼໍ່ຫຼອມຕົນເອງ ໃຫ້ກາຍເປັນພະນັກງານຫຼັກແຫຼ່ງ ໃນການຊີ້ນໍາ-ນໍາພາ ຢ່າງຮອບດ້ານ. ການທາບທາມຄັ້ງນີ້ ເປັນການເປີດກວ້າງປະຊາທິປະໄຕ ພາຍໃນຄະນະພັກສູນກາງສະຫະພັນແມ່ຍິງລາວ ເພື່ອບັນດາສະມາຊິກພັກຈະໄດ້ປະກອບຄໍາຄິດເຫັນ ຕໍ່ການຊີ້ນໍາ-ນໍາພາລວມ ຂອງອົງຄະນະພັກ ແນໃສ່ປັບປຸງຄະນະພັກສູນກາງສະຫະພັນແມ່ຍິງລາວ ໃຫ້ມີຄວາມປອດໃສ ເຂັ້ມແຂງ ແລະ ໜັກແໜ້ນ; ຕໍ່ກັບການປະກອບຄວາມຄິດເຫັນ ຈະເປັນເນື້ອໃນສໍາຄັນໃຫ້ແກ່ການດໍາເນີນຊີວິດການເມືອງ ສໍາຫຼວດກວດກາກາງສະໄໝ ພາຍໃນຄະນະພັກ ໃຫ້ມີເນື້ອໃນເລິກເຊິ່ງ ເພື່ອປັບປຸງທາງດ້ານຄຸນທາດການເມືອງ, ຄຸນສົມບັດ, ສິນທໍາປະຕິວັດ ແບບແຜນການດໍາລົງຊີວິດ, ການນໍາພາ, ວິທີເຮັດວຽກ ໃຫ້ຖືກຕ້ອງໜັກແໜ້ນ ຮັບປະກັນຄວາມເປັນແບບຢ່າງ ສ້າງຄວາມເຊື່ອໝັ້ນຕໍ່ສະມາຊິກພັກ, ພະນັກງານ-ລັດຖະກອນ ຕໍ່ການນໍາພາລວມຂອງຄະນະພັກ ກໍຄືແນວທາງການຊີ້ນໍາ-ນໍາພາຂອງພັກປະຊາຊົນປະຕິວັດລາວ ໃຫ້ນັບມື້ນັບກ້າວຂຶ້ນສູ່ສັງຄົມນິຍົມ. ກອງປະຊຸມດັ່ງກ່າວຈະດຳເນີນເປັນເວລາ 3 ວັນ.
