ຕອນບ່າຍວັນທີ 12 ພຶດສະພາ 2023, ຢູ່ທີ່ຫ້ອງປະຊຸມສູນກາງສະຫະພັນແມ່ຍິງລາວ ຈັດກອງປະຊຸມຄົບຄະນະກາງສະໄໝ ຂອງໜ່ວຍພັກຮາກຖານກົມຈັດຕັ້ງ-ພະນັກງານ ສູນກາງສະຫະພັນແມ່ຍິງລາວ, ໂດຍການເຂົ້າຮ່ວມ ແລະ ເປັນປະທານຂອງ ສະຫາຍ ນາງ ທຳມາ ເພັດວິໄຊ ຮອງເລຂາຄະນະພັກ ຮອງປະທານຄະນະບໍລິຫານງານສູນກາງສະຫະພັນແມ່ຍິງລາວ; ມີທ່ານນາງ ເຫຼັກ ແສນຄຳວົງສາ ເລຂາໜ່ວຍພັກກົມ ຫົວໜ້າກົມຈັດຕັ້ງ-ພະນັກງານ, ຄະນະໜ່ວຍພັກ, ຄະນະຕິດຕາມ-ຊຸກຍູ້ກອງປະຊຸມ ພ້ອມດ້ວຍສະມາຊິກພັກກົມຈັດຕັ້ງ-ພະນັກງານເຂົ້າຮ່ວມທັງໝົດ 13 ສະຫາຍ, ຊາຍ 01 ສະຫາຍ. ໃນກອງປະຊຸມ ສະຫາຍ ນາງ ເຫຼັກ ເເສນຄຳວົງສາ ໄດ້ຜ່ານຮ່າງບົດສະຫຼຸບຕີລາການຈັດຕັ້ງປະຕິບັດມະຕິກອງປະຊຸມໃຫຍ່ຂອງໜ່ວຍພັກ ຮາກຖານກົມຈັດຕັ້ງ-ພະນັກງານ ໄລຍະ 2022-2023, ຕິດພັນກັບມະຕິກອງປະຊຸມໃຫຍ່ ຄັ້ງທີ IV ຂອງອົງຄະນະພັກສູນກາງສະຫະພັນແມ່ຍິງລາວ ຄະນະໜ່ວຍພັກ ໄດ້ຖືສໍາຄັນວຽກງານສຶກສາອົບຮົມການເມືອງ-ແນວຄິດ ຕິດພັນກັບການປະຕິບັດໜ້າທີ່ການເມືອງ ຂອງສະມາຊິກພັກ, ພະນັກງານ-ລັດຖະກອນ, ປຸກລະດົມ, ສ້າງເງື່ອນໄຂເອື້ອອໍານວຍໃຫ້ສະມາຊິກພັກ, ພະນັກງານ-ລັດຖະກອນ ໄດ້ເຂົ້າຮ່ວມຮັບຟັງການເຜີຍແຜ່, ເຊື່ອມຊືມບັນດານິຕິກໍາຕ່າງໆຂອງພັກ, ຂອງລັດ ແລະ ຮັບຟັງປາຖະກະຖາວັນສໍາຄັນຂອງຊາດ, ຂອງພັກ, ຂອງອົງການຈັດຕັ້ງມະຫາຊົນ ແລະ ສາກົນ. ຜ່ານການສຶກສາອົບຮົມການເມືອງ-ແນວຄິດ ດ້ວຍຫຼາຍວິທີ ເຮັດໃຫ້ສະມາຊິກພັກ, ພະນັກງານ-ລັດຖະກອນ ມີທັດສະນະຫຼັກໝັ້ນ, ມີຄຸນສົມບັດສິນທໍາປະຕິວັດ, ເຊື່ອໝັ້ນຕໍ່ການນໍາພາຂອງພັກ ກໍຄືການຈັດຕັ້ງ, ມີຄວາມຫ້າວຫັນ, ບຸກບືນ ປະຕິບັດໜ້າທີ່ການເມືອງສໍາເລັດຕາມການມອບໝາຍ. ຈາກນັ້ນ ສະຫາຍ ນາງ ວົງອາກອນ ເພັງດາລິດ ຮອງເລຂາໜ່ວຍພັກ ໄດ້ຜ່ານຮ່າງບົດສຳຫຼວດການນຳພາລວມຂອງໜ່ວຍພັກຮາກຖານກົມຈັດຕັ້ງ-ພະນັກງານ. ຫຼັງຈາກນັ້ນ ໄດ້ດຳເນີນການທາບທາມ ແລະ ປະເມີນພະນັກງານນໍາພາ-ຄຸ້ມຄອງຕື່ມອີກ.
ໂອກາດນີ້ສະຫາຍ ນາງ ທຳມາ ເພັດວິໄຊ ໄດ້ມີຄຳເຫັນໂອ້ລົມ ໂດຍສະຫາຍໄດ້ເນັ້ນໜັກໃຫ້ຄະນະໜ່ວຍພັກ-ສະມາຊິກພັກທຸກສະຫາຍ ພ້ອມກັນຈັດຕັ້ງປະຕິບັດວຽກງານທີ່ເຫັນວ່າຍັງຄົງຄ້າງ, ເສີມຂະຫຍາຍດ້ານດີ, ສືບຕໍ່ປັບປຸງດ້ານອ່ອນຂໍ້ຄົງຄ້າງໃຫ້ສຳເລັດເປັນກ້າວໆ, ສືບຕໍ່ເອົາໃຈໃສ່ແກ້ໄຂວຽກງານທີ່ຍັງຄົງຄ້າງ, ເພື່ອເປັນບ່ອນອີງໃນການສືບຕໍ່ຈັດຕັ້ງປະຕິບັດວຽກງານທ້າຍສະໄໝໃຫ້ໄດ້ຮັບຜົນດີເທື່ອລະກ້າວ.
