ສະຫະພັນແມ່ຍິງລາວ

LAO WOMEN'S UNION

ກອງປະຊຸມໃຫຍ່ ຄັ້ງທີ IV ຂອງ ສຍ ຫ້ອງວ່າການລັດຖະບານ

 

ກາງເດືອນ ພະຈິກ 2014  ສຍ ຫ້ອງວ່າການລັດຖະບານໄດ້ຈັດກອງປະ ຊຸມໃຫຍ່ຄັ້ງທີ IV ຂຶ້ນ ທີ່ຫໍປະຊຸມແຫ່ງຊາດພາຍໃຕ້ການເປັນປະທານຂອງທ່ານນາງ ຈັນດີ ປັນແກ້ວ ປະທານ ສຍ ຫ້ອງວ່າການລັດຖະບານ,ໃຫ້ກຽດເຂົ້າຮ່ວມໂດຍທ່ານນາງ ສີໃສ ລືເດດມູນສອນ ກໍາມະການສູນກາງພັກ,ປະທານຄະນະບໍລິຫານງານສູນກາງສະຫະພັນແມຍິງລາວ ທ່ານ ສອນໄຊ ສີພັນດອນ ກໍາມະການສູນກາງພັກ, ລັດຖະມົນຕີ, ຫົວຫນ້າຫ້ອງວ່າ ການລັດຖະບານ, ທ່ານ ບຸນເພັງ ມູນໂພໄຊ ກຳມະການສູນກາງພັກ, ລັດຖະມົນຕີປະຈຳຫ້ອງວ່າການລັດຖະບານມີຕາງຫນ້າຈາກ ສຍ ບັນດາກະຊວງ, ອົງການ, ແຂກຖືກເຊີນ ແລະ ສະມາຊິກແມ່ຍິງທົ່ວຫ້ອງວ່າການເຂົ້າ ຮ່ວມ.

ກອງປະຊຸມໄດ້ຮັບຟັງບົດລາຍງານການເມືອງທັງສອງພາກ ໂດຍຍົກໃຫ້ເຫັນການຈັດຕັ້ງປະຕິບັດມະຕິ ກອງປະຊຸມໃຫຍ່ ຄັ້ງທີ III ຂອງ ສຍ ຜ່ານມາຍົກໃຫ້ເຫັນຜົນສໍາເລັດ, ຈຸດດີ, ຂໍ້ຄົງຄ້າງທີ່ຈະຕ້ອງໄດ້ປັບປຸງແກ້ໄຂໃນຕໍ່ຫນ້າ. ສຍ ໄດ້ເອົາໃຈໃສ່ໃນການສຶກສາອົບຮົມການເມືອງ-ແນວຄິດ ໃຫ້ສະມາຊິກເອື້ອຍນ້ອງແມ່ຍິງເປັນຕົ້ນຕໍ, ນໍາເອົາມະຕິກອງປະຊຸມໃຫຍ່ຄັ້ງທີ IX ຂອງພັກ, ມະຕິກອງປະຊຸມໃຫຍ່ຄັ້ງທີ VI ຂອງຜູ້ແທນແມ່ຍິງລາວໃນທົ່ວປະເທດ ໂດຍເນັ້ນໃສ່ເນື້ອໃນຂໍ້ແຂ່ງຂັນ 3 ດີ ຂອງແມ່ຍິງລາວຕິດພັນກັບຂໍ້ແຂ່ງຂັນຮັກຊາດ ແລະ ພັດທະນາຂອງພັກ ກົດຫມາຍວ່າດ້ວຍສະຫະພັນແມ່ຍິງລາວມາເຜີຍແຜ່ໃຫ້ແກ່ເອື້ອຍນ້ອງແມ່ຍິງ ເພື່ອໃຫ້ມີຄວາມຮັບຮູ້, ເຂົ້າໃຈຕໍ່ແນວທາງນະໂຍບາຍຂອງພັກ-ລັດ, ແຜນພັດທະນາແມ່ຍິງລາວເພື່ອໃຫ້ເອື້ອຍນ້ອງແມ່ຍິງໄດ້ຮັບການພັດທະນາ,ມີມາດຖານພຽງພໍເຂົ້າໃນຕໍາແຫນ່ງບໍລິຫານຂັ້ນຕ່າງໆ.ກອງປະຊຸມໄດ້ປ່ອນບັດຄັດເລືອກເອົາຄະນະບໍລິຫານງານ ສຍ ຊຸດໃຫມ່ 9 ທ່ານ ໂດຍແມ່ນ ທ່ານນາງ ບຸນຫນັກ ຫຼວງລາດ ເປັນປະທານ, ທ່ານ ດຣ ນາງ ບົວວອນ ສຸກລາແສງ ແລະ ທ່ານນາງ ພິມພາ ຈັນທະວົງສາ ເປັນຮອງ ທັງເປັນປະທານກວດກາ.

ໂອກາດສໍາຄັນນີ້ ໄດ້ຮັບຟັງການໂອ້ລົມຂອງ ທ່ານນາງ ສີໃສ ລືເດດມູນສອນ ແລະ ທ່ານ ສອນໄຊ ສີພັນດອນ ທັງສອງທ່ານໄດ້ເນັ້ນໃຫ້ ສຍ ຫ້ອງວ່າການ ລັດຖະບານສືບຕໍ່ເອົາໃຈໃສ່ເຊື່ອມຊຶມ ແລະ ກໍາແຫນ້ນ ສິດຫນ້າທີ່ຂອງ ສຍ ກະຊວງ, ອົງການຕາມທີ່ໄດ້ກໍານົດໄວ້ໃນກົດຫມາຍຂອງ ສຍລ, ສືບຕໍ່ເອົາໃຈໃສ່ວຽກງານ ສຶກສາອົບຮົມການເມືອງ-ແນວຄິດໃຫ້ແກ່ຖັນແຖວສະມາຊິກ ສຍ, ຮັບຮູ້ເຊື່ອມຊຶມແນວທາງຂອງພັກ-ລັດ, ເພີ່ມທະ ວີຄວາມເປັນເຈົ້າການໃນການປັບປຸງການຈັດຕັ້ງ ສຍ ໃຫ້ມີຄວາມເຂັ້ມແຂງ, ເຕົ້າໂຮມຄວາມສາມັກຄີກໍ່ສ້າງຊ່ວຍເຫຼືອເຊິ່ງກັນແລະກັນ,ປຸກລະດົມແມ່ຍິງເຂົ້າຮ່ວມການປະຕິບັດສອງຫນ້າທີ່ຍຸດທະສາດຂອງພັກ ແລະ ແຜນພັດທະນາແມ່ຍິງ,ມີແຜນການດໍາເນີນງານຕະຫຼອດໄລຍະ,ແບ່ງງານ,ແບ່ງຄວາມຮັບຜິດຊອບຊີ້ນໍາໆພາແຕ່ລະພາກສ່ວນ,ສ້າງໂອກາດ-ເງື່ອນໄຂໃຫ້ພະນັກງານລັດຖະກອນເພດຍິງໄດ້ຮັບການພັດທະນາໃນທຸກດ້ານ.

ກອງປະຊຸມໃຫຍ່ ຄັ້ງທີ X ຂອງ ສຍ ກະຊວງການຕ່າງ ປະເທດ ແລະ ຄະນະພົວພັນຕ່າງປະເທດສູນກາງພັກ

ໃນເດືອນດຽວກັນນີ້ ສຍ ກະຊວງການຕ່າງປະເທດ ແລະ ຄະນະພົວພັນຕ່າງປະເທດສູນກາງພັກໄດ້ຈັດກອງປະຊຸມໃຫຍ່ຄັ້ງທີ X ຂອງຕົນຂຶ້ນ. ໃຫ້ກຽດເຂົ້າຮ່ວມໂດຍທ່ານນາງ ສີໃສ ລືເດດມູນສອນ,ກໍາມະການສູນກາງພັກ,ປະທານຄະນະບໍລິຫານງານສູນກາງສະຫະພັນແມ່ຍິງລາວ,ທ່ານ ດຣ ນາງ ສູນທອນ ໄຊຍະຈັກ ກໍາມະການສູນກາງພັກ,ລັດຖະມົນຕີຊ່ວຍວ່າການກະຊວງການຕ່າງປະເທດແຂກຖືກເຊີນ ແລະ ສະມາຊິກແມ່ຍິງເຂົ້າຮ່ວມ 300 ກວ່າທ່ານ.

ກອງປະຊຸມໄດ້ຕີລາຄາຜົນງານການເຄື່ອນໄຫວວຽກງານ 5 ປີ ຜ່ານມາ ແລະທິດທາງແຜນການ 5 ປີ ຕໍ່ຫນ້າ.ສຍ ກະຊວງການຕ່າງປະເທດໄດ້ມີຜົນສໍາເລັດຫລາຍດ້ານເປັນຕົ້ນແມ່ນ: ວຽກງານສຶກສາອົບຮົມການເມືອງແນວຄິດຕິດພັນກັບການເຄື່ອນໄຫວວຽກງານວິຊາສະເພາະ,ຈັດຕັ້ງກິດຈະກໍາຮ່ວມກັບບັນດາພັນລະຍານັກການທູດທີ່ປະຈໍາຢູ່ ສປປລາວ ເພື່ອລະດົມທຶນຊ່ວຍເຫລືອປະຊາຊົນລາວຜູ້ທີ່ຖືກກະທົບຈາກໄພພິບັດ ແລະຜູ້ດ້ອຍໂອກາດທີ່ຢູ່ຫ່າງໄກສອກຫຼີກເປັນມູນຄ່າຫລາຍກວ່າ 430 ລ້ານກີບ.ໄດ້ຕັ້ງຫນ້າຄົ້ນຄ້ວາຈັດຕັ້ງປະຕິບັດຂໍ້ແຂ່ງຂັນ 3 ດີ ຂອງ ສຍ ລາວຕາມເງື່ອນໄຂແທດເຫມາະກັບສະພາບຈຸດພິເສດຂອງຕົນເພື່ອຈັດຕັ້ງປະຕິບັດໃຫ້ປະກົດຜົນເປັນຈິງ.ຜູ້ແທນກອງປະຊຸມໄດ້ປ່ອນບັດຄັດເລືອກເອົາຄະນະ ສຍ ຊຸດໃຫມ່ 7 ທ່ານ,ເລືອກໄດ້ທ່ານ ນາງ ພິມພາ ແກ້ວມີໄຊ ເປັນປະທານ, ທ່ານນາງ ມະນີລາ ສົມບັນດິດ ເປັນຮອງ ແລະ ທ່ານນາງ ຈັນສະຫມອນ ຊາຍກັນຍາ ເປັນຮອງທັງເປັນປະທານກວດກາ.ກອງປະຊຸມໄດ້ຮັບຟັງການໂອ້ລົມຈາກທ່ານ ນາງ ສີໃສ ລືເດດມູນສອນ ແລະ ທ່ານ ດຣ ນາງ ສູນທອນ ໄຊຍະຈັກ...ໂດຍເນັ້ນໃຫ້ຄະນະ ສຍ ຊຸດໃຫມ່ ເອົາໃຈໃສ່ສຶກສາອົບຮົມການເມືອງ-ແນວຄິດໃຫ້ຖັນແຖວສະມາຊິກແມ່ຍິງ ໂດຍສະເພາະແມ່ນຄຸນລັກສະນະທີ່ເປັນມູນເຊື້ອຂອງແມ່ຍິງລາວມີຄວາມດຸຫມັ່ນ,ຄົ້ນຄວ້າຮໍ່າຮຽນພາສາຕ່າງປະເທດໃຫ້ຫລາຍຂຶ້ນເອົາໃຈໃສ່ປັບປຸງການຈັດຕັ້ງແມ່ຍິງໃຫ້ຫນັກແຫນ້ນກໍາໄດ້ການເຄື່ອນໄຫວຂອງເອື້ອຍນ້ອງແມ່ຍິງທັງພາຍໃນ ແລະ ຕ່າງປະເທດ.