3

 ເພື່ອທົບທວນຫວນຄືນມູນເຊື້ອປະຫວັດສາດການກໍາເນີດ, ເຕີບໃຫຍ່ຂະຫຍາຍຕົວ ແລະ ຜົນງານການເຄື່ອນໄຫວຂອງອົງການຈັດຕັ້ງ ສະຫະພັນແມ່ຍິງລາວ (ສຍລ) ກໍຄືແມ່ຍິງລາວບັນດາເຜົ່າທີ່ໄດ້ອຸທິດຕົນ ເພື່ອພາລະກິດຕໍ່ສູ້ປົດປ່ອຍ ຊາດ, ປົກປັກຮັກສາ ແລະ ສ້າງສາພັດທະນາ ປະເທດຊາດ ກໍຄືພາລະກິດພັດທະນາແມ່ຍິງ ຕະຫຼອດໄລຍະເວລາ 62 ປີ (ວັນທີ 20 ກໍລະກົດ 1955-20 ກໍລະກົດ 2017), ສູນ ກາງສະຫະພັນແມ່ຍິງລາວ (ສສຍລ) ໄດ້ຮ່ວມກັບສະຫະພັນແມ່ຍິງ (ສຍ) ທະນາຄານແຫ່ງ ສປປລາວ ຈັດຕັ້ງພິທີສະເຫຼີມສະຫຼອງຂຶ້ນທີ່ສະໂມ ສອນສະຖາບັນການທະນາຄານ ໃນວັນທີ 15 ກໍລະກົດ ໂດຍ ການເປັນປະທານຂອງ ທ່ານ ດຣ ນາງ ອິນລາວັນ ແກ້ວບຸນພັນ ກໍາມະການສູນກາງ ພັກ ປະທານຄະນະບໍລິຫານງານ ສສຍລ, ໃຫ້ກຽດເຂົ້າຮ່ວມໂດຍ ທ່ານ ສົມພາວ ໄຟສິດ ກຳມະການສູນກາງພັກ, ຜູ້ວ່າການ ທະນາຄານແຫ່ງ ສປປລາວ, ທ່ານ ປ້າ ຄຳເມິງ ວໍລະຈິດ ພັນລະຍາຂອງທ່ານປະ ທານປະເທດ ແຫ່ງ ສປປ ລາວ, ພ້ອມດ້ວຍ ການນໍາ ພັກ-ລັດ, ຄະນະບໍລິຫານງານ ສສຍລ, ສະມາຊິກ ສຍ ຈາກກະຊວງ-ອົງ ການຂັ້ນສູນກາງ ແລະ ນະຄອນຫຼວງ ເຂົ້າ ຮ່ວມ 1,000 ກວ່າຄົນ.

            ທ່ານປະທານຄະນະບໍລິຫານງານ ສສຍລ ໄດ້ກ່າວປາໄສຕໍ່ພິທີ ຊຶ່ງບາງຕອນກ່າວເຖິງມູນເຊື້ອອັນສະຫງ່າລາສີຂອງແມ່ຍິງທີ່ໄດ້ອຸທິດ ເລືອດເນື້ອ, ເຫື່ອ ແຮງ, ສະຕິປັນຍາ, ຄຽງບ່າຄຽງໄຫຼ່ກັບເພດຊາຍໃນການຕໍ່ສູ້ກູ້ຊາດ ຍາດເອົາເອກະລາດອະທິປະໄຕ ແລະ ປະກອບສ່ວນສ້າງ ໜ້າປະຫວັດສາດອັນສະຫວ່າງສະໄຫວຂອງຊາດລາວ. ນັບແຕ່ຫົວທີທີ່ພັກປະຊາຊົນລາວໄດ້ຮັບການສ້າງຕັ້ງຂຶ້ນ ພັກໄດ້ ວາງແນວທາງໃນການປົດ ປ່ອຍແມ່ຍິງ, ພັກຖືວ່າແມ່ຍິງກວມຈຳນວນເຄິ່ງໜຶ່ງຂອງພົນລະເມືອງໃນທົ່ວປະເທດ, ເປັນກຳລັງແຮງອັນໃຫຍ່ຫຼວງໃນທຸກຂົງເຂດວຽກງານ, ເປັນກຳ ລັງແຮງພິເສດທີ່ຜະລິດສໍ່າກຳລັງແຮງງານ (ໝາຍຄວາມວ່າແມ່ຍິງມີບົດ ບາດໃຫ້ກຳເນີດຄົນຮຸ່ນໃໝ່), ແມ່ຍິງມີຖານະທີ່ຕັ້ງອັນສຳຄັນຍິ່ງໃນຄອບ ຄົວ, ມີຄຸນປະໂຫຍດຕັດສິນຕໍ່ພາລະກິດຂອງລູກ, ຜົວ. ການຈັດຕັ້ງ ສຍລ ມີຈຸດເລີ່ມຕົ້ນ ພ້ອມ ກັບບັນດາອົງການຈັດຕັ້ງຮາກຖານຂອງການປະຕິ ວັດ ໂດຍໄດ້ຈັດຕັ້ງໜ່ວຍແມ່ນັກຮົບ, ເອື້ອຍນັກຮົບ. ການຈັດຕັ້ງໜ່ວຍແມ່ນັກຮົບຢູ່ຊົນນະບົດ, ໜ່ວຍຍຸວັນນາ ລີ ຢູ່ຕາມຕົວເມືອງໄດ້ເຄື່ອນໄຫວ ແລະ ເຕີບໃຫຍ່ຂະຫຍາຍຕົວນັບມື້ນັບກວ້າງຂວາງ. ມາຮອດວັນທີ 20 ກໍລະກົດ 1955  ພັກໄດ້ຈັດຕັ້ງໜ່ວຍຄົ້ນຄວ້າວຽກງານ ແມ່ຍິງຂຶ້ນ ຊຶ່ງເປັນຕົ້ນກໍາເນີດຂອງອົງການຈັດຕັ້ງ ສຍລ ໃນປັດຈຸບັນ ແລະ ໄດ້ແຕ່ງຕັ້ງຄະນະ ປະກອບມີ: ທ່ານ ປ້າ ຄຳຫຼ້າ ວົງສັກ ເປັນຫົວໜ້າ, ທ່ານ ປ້າ ຄຳສຸກ ວົງວິຈິດ ເປັນຮອງ ແລະ ທ່ານ ປ້າ ຄຳ ແພງ ບຸບຜາ ເປັນກຳມະການ ເພື່ອນຳພາຂະບວນການແມ່ຍິງທົ່ວປະເທດ ຊຶ່ງເຄື່ອນໄຫວຕາມພາລະບົດ ບາດທີ່ໄດ້ກໍານົດໄວ້ໃນລະບຽບຂອງຕົນ ແລະ ສອດ ຄ່ອງກັບຄວາມຮຽກຮ້ອງຕ້ອງການຂອງສັງຄົມແຕ່ລະໄລຍະ. 

ຕະຫຼອດໄລຍະແຫ່ງການຕໍ່ສູ້ກູ້ຊາດ ແມ່ຍິງລາວບັນດາເຜົ່າກໍຄືສະຫະພັນແມ່ຍິງລາວ ໄດ້ປະກອບສ່ວນໃນການຂົນຂວາຍຂະບວນການ ແມ່ຍິງທົ່ວປະເທດ, ເຮັດໜ້າທີ່ໃນການລ້ຽງດູ, ເບິ່ງແຍງ, ຊຸກເຊື່ອງ, ຕິດຕໍ່, ສົ່ງຂ່າວພະນັກງານ, ທະຫານປະຕິວັດທີ່ຢູ່ແນວໜ້າ ແລະ ເຂດຄວບ ຄຸມຂອງສັດຕູດ້ວຍຫຼາຍຮູບແບບ ແລະ ຫຼາຍວິທີການ; ລໍາລຽງສະບຽງອາຫານ, ອາວຸດ, ເຄື່ອງນຸ່ງຫົ່ມໃຫ້ພະນັກງານ, ນັກຮົບຢູ່ແນວໜ້າ; ປຸກລະ ດົມຂົນຂວາຍຊາວໜຸ່ມ, ລູກຫຼານອອກຮັບໃຊ້ປະ ເທດຊາດ, ປຸກລະດົມຂະບວນການຂອງແມ່ຍິງປະຕິບັດວຽກງານແນວຫຼັງ, ເພີ່ມ ພູນຜະລິດ ຜົນຫາລ້ຽງກຸ້ມຕົນເອງ, ປະຢັດ ເຂົ້າປາອາຫານເພື່ອສົ່ງໄປແນວໜ້າ, ພ້ອມທັງເຄື່ອນໄຫວປະຕິບັດໜ້າທີ່ສູ້ຮົບຢ່າງອົງອາດກ້າຫານ, ເຂົ້າຮ່ວມເປັນ ກຳລັງແຮງສຳຄັນໃນທຸກຂົງເຂດວຽກງານທາງດ້ານການເມືອງ, ເສດຖະກິດ, ວັດທະນະ ທຳ-ສັງຄົມ ແລະ ປະຕິບັດວຽກງານອື່ນ ດ້ວຍຄວາມຮັບ ຜິດຊອບສູງ ພ້ອມທັງຄຽງບ່າຄຽງໄຫຼ່ກັບເພດຊາຍໃນການຕໍ່ສູ້ກັບສັດຕູ ຕີເອົາຊະນະຈັກກະພັດຜູ້ຮຸກຮານ ນັບເປັນເວລາຫຼາຍສິບປີ ມີແມ່ຍິງໄດ້ເປັນ ວິລະຊົນແຫ່ງຊາດ ຈຳນວນ 22 ທ່ານ  ແລະ ເປັນນັກຮົບແຂ່ງຂັນທົ່ວປະເທດ ຈຳ ນວນ 24 ທ່ານ ການອຸທິດອັນໃຫຍ່ຫຼວງຂອງແມ່ຍິງບັນດາເຜົ່າ ໄດ້ເຮັດໃຫ້ກຳລັງປະຕິວັດນັບມື້ນັບເຕີບໃຫຍ່ເຂັ້ມແຂງ ເປັນການປະກອບສ່ວນເຂົ້າໃນການສະຖາປະນາ ສປປ ລາວ ໃນວັນທີ 2 ທັນວາ 1975.

            ນັບແຕ່ປີ 1976 ເປັນຕົ້ນມາ, ເພື່ອ ສືບຕໍ່ປະຕິບັດສອງໜ້າທີ່ຍຸດທະສາດແຫ່ງການປົກປັກຮັກສາ ແລະ ສ້າງສາພັດທະ ນາປະເທດຊາດ, ສຍລ ໄດ້ປະກອບສ່ວນຢ່າງຕັ້ງໜ້າໃນການປະຕິບັດໜ້າທີ່ການ ເມືອງທີ່ຖືກມອບໝາຍໃນແຕ່ລະໄລຍະ, ເວົ້າສະເພາະ ນັບແຕ່ປີ 1984 ໄດ້ຜັນ ຂະຫຍາຍມະຕິກອງປະຊຸມໃຫຍ່ຜູ້ແທນແມ່ຍິງແຕ່ລະຄັ້ງ (ແຕ່ຄັ້ງທີ I-VII) ມາເປັນ ແຜນງານ, ໂຄງການ, ກິດຈະກໍາອັນລະ ອຽດຂອງຕົນ ພ້ອມທັງ ເຜີຍແຜ່ ແລະ ຈັດຕັ້ງປະຕິບັດຕົວຈິງໃນຂັ້ນຂອງຕົນຢ່າງເປັນຂະບວນການກວ້າງຂວາງ, ໄດ້ນຳພາປັບປຸງກົງຈັກການຈັດຕັ້ງພາຍໃນ ສສຍລ,  ພາລະ ບົດບາດ ແລະ ການເຄື່ອນໄຫວຂອງ ຄະນະ ສຍ ຂັ້ນແຂວງ, ກະຊວງ, ອົງການ, ນະຄອນຫຼວງ ແລະ ທ້ອງຖິ່ນໃຫ້ມີຄວາມໜັກແໜ້ນເຂັ້ມແຂງ. ສຍລ ໄດ້ສືບຕໍ່ປະຕິບັດພາລະບົດບາດເຕົ້າໂຮມຄວາມສາມັກຄີ, ປຸກລະດົມຊຸກຍູ້ແມ່ຍິງລາວເຂົ້າຮ່ວມປະຕິບັດສອງໜ້າທີ່ຍຸດທະສາດ, ການປະຕິ ບັດຄວາມສະເໝີພາບລະຫວ່າງ ຍິງ-ຊາຍ, ການເຮັດໜ້າທີ່ປົກປ້ອງສິດຜົນປະໂຫຍດຂອງແມ່ຍິງ ແລະ ເດັກນ້ອຍ ການປົກປັກຮັກສາວັດທະນະທຳ, ເປັນເຈົ້າການປະຕິບັດແຜນພັດທະນາແມ່ຍິງລາວ, ພ້ອມກັນນຳພາຂະບວນການແມ່ຍິງ ລາວບັນດາເຜົ່າປະຕິບັດຄຳຂວັນ, ຂໍ້ແຂ່ງ ຂັນຂອງສະຫະພັນ ແມ່ຍິງລາວ ຕິດພັນ ກັບການແຂ່ງຂັນຮັກຊາດ ແລະ ພັດທະ ນາ, ການຈັດຕັ້ງປະຕິບັດແນວທາງນະໂຍ ບາຍຂອງພັກ-ລັດແຕ່ລະໄລຍະ.

            ໂອກາດນີ້ ຜູ້ເຂົ້າຮ່ວມຍັງໄດ້ຮັບຊົມລາຍການສະແດງມ່ວນຊື່ນແບບມວນຊົນ ຊຶ່ງປະກອບມີການສະແດງຂະບວນແຫ່ຂັນໝາກເບັງ, ການ ສະແດງຮ້ອງເພງດ່ຽວ ແລະ ລວມໝູ່, ການເດີນແບບຊຸດເຄື່ອງນຸ່ງຊົນເຜົ່າ ແລະ ການເດີນແບບຊຸດເຄື່ອງແບບຂອງບັນດາທະນາຄານ ໃນ ສປປລາວ. ການສະແດງດັ່ງກ່າວໄດ້ສ່ອງແສງໃຫ້ເຫັນເຖິງມູນເຊື້ອວັດທະນະທໍາ, ຮີດຄອງປະເພນີ ແລະ ແບບແຜນການດໍາລົງຊີວິດຂອງເອື້ອຍນ້ອງແມ່ຍິງ ແຕ່ ອະດີດເຖິງປັດຈຸບັນ. ໃນວາລະສຸດທ້າຍຂອງພິທີຜູ້ເຂົ້າຮ່ວມໄດ້ທ່ຽວຊົມການວາງສະແດງຜະລິດຕະພັນຂອງແມ່ຍິງລາວຕື່ມອີກ.

            ນອກຈາກນີ້ ຍັງມີ ສຍ ບັນດາກະຊວງ, ອົງການອ້ອມຂ້າງສູນກາງ ຈັດພິທີສະຫຼອງວັນສ້າງຕັ້ງສະຫະພັນແມ່ຍິງລາວຂຶ້ນ ເປັນຕົ້ນ ສຍ ສູນກາງແນວລາວສ້າງຊາດກະຊວງກະສິກຳ ແລະ ປ່າໄມ້, ກະຊວງການເງິນ, ກະຊວງການຕ່າງປະເທດ, ກະຊວງປ້ອງກັນປະເທດ, ກະຊວງໄປສະ ນີ ໂທລະຄົມມະນາຄົມ ແລະ ການສື່ສານ, ກະຊວງແຜນການ ແລະ ການລົງທຶນ, ກະຊວງພະລັງງານ ແລະ ບໍ່ແຮ່, ກະຊວງສຶກສາທິການ ແລະ ກິລາ, ກະຊວງໂຍທາທິການ ແລະ ຂົນສົ່ງ, ຫ້ອງການປົກຄອງເມືອງສີໂຄດຕະບອງ, ສຍ ບັນດາກະ ຊວງ, ອົງການ, ນະຄອນຫຼວງວຽງຈັນ ແລະ ສຍ ບັນດາແຂວງ, ເມືອງໃນຂອບເຂດທົ່ວປະເທດ.

                                                                                                                                                                                                                ໂດຍ: ອິນດາວອນ