1031310314

ເພື່ອສະຫຼຸບຕີລາຄາການເຄື່ອນໄຫວວຽກງານຮອບດ້ານຂອງສະຫະພັນແມ່ຍິງລາວໃນໄລຍະປີ 2018ພ້ອມທັງວາງທິດທາງແຜນການໃນປີ 2019 ແລະ ສະຫຼຸບຕີລາຄາການຈັດຕັ້ງປະຕິບັດມະຕິກອງປະຊຸມ ຄົບຄະນະບໍລິຫານງານສູນກາງສະຫະພັນແມ່ຍິງລາວ (ສສຍລ)ຄັ້ງທີ 3 ສະໄໝທີ VII ດັ່ງນັ້ນ, ສສຍລໄດ້ ເປີດກອງປະຊຸມຄົບຄະນະບໍລິຫານງານສສຍລຄັ້ງທີ 4 ສະໄໝທີ VII ໃນວັນທີ 12 ຕຸລາທີ່ຖໍ້າການເມືອງ, ເມືອງວຽງໄຊ, ແຂວງຫົວພັນ ໂດຍການເປັນປະທານຂອງທ່ານນາງອິນລາວັນແກ້ວບຸນພັນກຳມະການສູນກາງພັກ, ປະທານຄະນະບໍລິຫານງານສສຍລ, ທ່ານ ວັນໄຊ ແພງຊຸມມາ ກຳມະການສູນກາງພັກ, ເລຂາພັກແຂວງເຈົ້າແຂວງໆຫົວພັນ, ໃຫ້ກຽດເຂົ້າຮ່ວມມີທ່ານປ້ານາລີສີສຸລິດພັນລະຍາທ່ານນາຍົກລັດຖະມົນ ຕີແຫ່ງສປປລາວ, ມີຄະນະປະທານສສຍລ, ຮອງປະທານສູນກາງແນວລາວສ້າງຊາດ, ຮອງປະທານສູນກາງສະຫະພັນກຳມະບານລາວ, ຮອງເລຂາຊປປລ,ຄະນະບໍລິຫານງານສສຍລ, ປະທານສຍແຂວງ, ກະຊວງ-ອົງການແລະແຂກຖືກເຊີນເຂົ້າຮ່ວມ 86 ທ່ານ, ເປັນຍິງ 80 ທ່ານ.

      ໃນກອງປະຊຸມຜູ້ເຂົ້າຮ່ວມໄດ້ຮັບຟັງການສະຫຼຸບຕີລາຄາການເຄື່ອນໄຫວວຽກງານຮອບດ້ານຂອງສຍລາວ 9 ເດືອນ

(ມັງກອນ-ກັນຍາ) ແຜນຄາດຄະເນ 3 ເດືອນທ້າຍປີ 2018 ແລະທິດທາງແຜນການປະຈຳປີ 2019, ບົດສຳຫຼວດການນຳພາຂອງຄະນະບໍລິຫານງານສູນກາງສະຫະພັນແມ່ຍິງລາວສະໄໝທີ VII ຊຶ່ງໄດ້ຍົກໃຫ້ເຫັນຜົນງານທີ່ພົ້ນເດັ່ນຫຼາຍດ້ານເປັນຕົ້ນ: ດ້ານການເມືອງ-ແນວຄິດ, ສະມາຊິກສຍມີຄວາມເຊື່ອໝັ້ນຕໍ່ການນຳພາຂອງພັກ, ເອົາໃຈໃສ່ຕັ້ງໜ້າປະຕິບັດ 2 ໜ້າທີ່ຍຸດທະສາດປົກປັກຮັກສາ  ແລະສ້າງສາພັດທະນາປະເທດຊາດ, ຮັກສາໄດ້ຄຸນລັກສະນະທີ່ເປັນມູນເຊື້ອຂອງແມ່ຍິງລາວ, ປະກອບສ່ວນເຂົ້າໃນການພັດທະນາເສດຖະກິດ-ສັງຄົມ, ການຈັດຕັ້ງສຍແຕ່ລະຂັ້ນໄດ້ຮັບການປັບປຸງທາງດ້ານກົງຈັກແລະບຸກຄະລາກອນນັບມື້ມີຄວາມເຂັ້ມແຂງສາມາດຕອບສະໜອງຕາມພາລະບົດບາດໜ້າທີ່, ຄວາມຮຽກຮ້ອງຕ້ອງການຕົວຈິງ, ການຈັດຕັ້ງປະຕິບັດຄຳຂວັນ, ຂໍ້ແຂ່ງຂັນ 3 ດີຕິດພັນກັບທິດສາມສ້າງແລະການສົ່ງເສີມສິດສະເໝີພາບລະຫວ່າງຍິງ-

ຊາຍໃນຄອບຄົວ,ການປະຕິບັດພັນທະສາກົນທີ່ກ່ຽວພັນເຖິງການພັດທະນາແລະປົກປ້ອງສິດຜົນປະໂຫຍດຂອງແມ່ຍິງແລະເດັກນ້ອຍກໍຄືຄວາມກ້າວໜ້າຂອງແມ່ຍິງ.ຈາກນັ້ນໄດ້ຮັບຟັງການຜ່ານຮ່າງບົດສະຫຼຸບການຈັດຕັ້ງຜັນຂະຫຍາຍມະຕິກອງປະຊຸມຄົບຄະນະບໍລິຫານງານສສຍລຄັ້ງທີ 3 ສະໄໝທີ VII; ສະຫຼຸບກາງສະໄໝວຽກງານສົ່ງເສີມຄວາມກ້າວໜ້າ, ຄວາມສະເໝີພາບຍິງ-ຊາຍ, ແມ່-ເດັກແລະລຶບລ້າງການໃຊ້ຄວາມຮຸນແຮງຕໍ່ແມ່ຍິງແລະເດັກແລະທິດທາງ ແຜນການຕໍ່ໜ້າ.ກອງປະຊຸມໄດ້ຕົກລົງຮັບຮອງເອົາວຽກງານຈຸດສຸມໃນປີ 2019ລວມມີ 16 ວຽກ.

      ໃນຕອນທ້າຍຂອງກອງປະຊຸມທ່ານປ້ານາລີສີສຸລິດໄດ້ມີບາງຄຳເຫັນໂອ້ລົມຊຶ່ງທ່ານໄດ້ເນັ້ນໜັກ3 ຈຸດຄື: 1.ໃຫ້ຄະນະສຍແຕ່ລະຂັ້ນສືບຕໍ່ເອົາໃຈໃສ່ ສຶກສາອົບຮົມການເມືອງ-ແນວຄິດໃຫ້ແກ່ສະມາຊິກສຍ, ແມ່ຍິງລາວບັນດາເຜົ່າໃຫ້ມີຄຸນທາດການເມືອງໜັກແໜ້ນ, ມີຄຸນສົມບັດສິນທຳປະຕິວັດ, ຮູ້ຮັກຊາດຮັກກຽດສັກສີ, ຮັກສາຄຸນລັກສະນະທີ່ເປັນມູນເຊື້ອຂອງແມ່ຍິງລາວ; ຄະນະສຍຕ້ອງສູ້ຊົນຝຶກຝົນຫຼໍ່ຫຼອມຕົນເອງດ້ວຍການບຸກທະລຸທັງ 4 ດ້ານ, ແກ້ໄຂທັດສະນະຄຳພີຕາຍຕົວແນວຄິດຄັບແຄບໃຈນ້ອຍບໍ່ສະໜັບສະໜູນຊຶ່ງກັນແລະກັນ; ພ້ອມກັນຮຽນຮູ້ສິ່ງໃໝ່ໆ ເພື່ອພັດທະນາຕົນເອງແລະ

ການຈັດຕັ້ງ, ກ້າຄິດກ້າເຮັດກ້າຮັບຜິດຊອບ, ມີຄວາມສາມັກຄີເປັນເອກະພາບກັນຢ່າງແໜ້ນແຟ້ນ, ສະໝ່ຳສະເໝີກວ່າເກົ່າ. 2. ເອົາໃຈໃສ່ສົ່ງເສີມຄວາມກ້າວໜ້າຂອງແມ່ຍິງ, ສູ້ຊົນປູກຈິດສຳນຶກອັນດີໃຫ້ ເອື້ອຍນ້ອງແມ່ຍິງ, ຮ່ວມກັນຕ້ານທຸກປະກົດການຫຍໍ້ທໍ້ທີ່ເກີດຂຶ້ນກັບແມ່ຍິງໃຫ້ໝົດໄປ ເວົ້າສະເພາະການຕ້ານການໃຊ້ຄວາມຮຸນແຮງຕໍ່ແມຍິງ-ເດັກນ້ອຍໃນທຸກຮູບແບບເພື່ອປົກປ້ອງສິດຜົນປະໂຫຍດອັນຊອບທຳຂອງເອື້ອຍນ້ອງແມ່ຍິງ,ເສີມຂະຫຍາຍສິດສະເໝີພາບບົດບາດຍິງ-ຊາຍ ໃຫ້ເປັນຮູບປະທຳເທື່ອລະກ້າວ. 3. ການບູລະນະຖ້ຳຫ້ອງການສະມາຄົມແມ່ຍິງລາວ (ຖຳ້ສູງ)ໃຫ້ສອດຄ່ອງແລະແທດເໝາະກັບຕົວຈິງເປັນຕົ້ນ: ຕຽງນອນ, ເຄື່ອງໃຊ້ສອຍໃນຊີວິດປະຈຳວັນ, ສາດ, ບ່ອນນອນ, ໝອນແລະໃຫ້ສ້າງຂັ້ນໄດໄມ້ທາງຂຶ້ນຖຳ້ ມີໂຕະ,ຕັ່ງແລະອື່ນໆໃຫ້ຄືກັບແຕ່ກ່ອນເພື່ອສ່ອງແສງໃຫ້ເຫັນການດຳລົງຊີວິດຂອງການນຳຮຸ່ນກ່ອນທີ່ຜ່ານຜ່າຄວາມທຸກຍາກລຳບາກອຸທິດຊີວິດໃຫ້ແກ່ການປະຕິວັດໂດຍບໍ່ຮຽກຮ້ອງຜົນປະໂຫຍດໃດໆ ຂໍໃຫ້ຄົນຮຸ່ນໜຸ່ມຈົ່ງຮຳ່ຮຽນເອົາຄຸນງາມຄວາມດີນັ້ນໄວ້ ແລະຮຽກຮ້ອງໃຫ້ພວກເຮົາພ້ອມກັນກຳຈັດບັນຫາທີ່ຄ້າງຄາແລະຍືດເຍື້ອມາດົນໃຫ້ໝົດໄປເຮັດໃຫ້ແມ່ຍິງເຮົາມີຄວາມສຸກຄວາມຈະເລີນກ້າວໜ້າໄປສູ່ໄຊຊະນະທີ່ຍິ່ງໃຫຍ່ກວ່າເກົ່າແລະພ້ອມກັນນຳພາຈັດຕັ້ງປະຕິບັດມະຕິກອງປະຊຸມຄົບຄະນະບໍລິຫານງານສສຍລຄັ້ງນີ້ ຢ່າງມີຜົນສຳເລັດແລະມີຄຸນນະພາບ.