10307

ເພື່ອກະກຽມໃຫ້ແກ່ກອງປະຊຸມໃຫຍ່ 3 ຂັ້ນຂອງພັກແລະຂອງສະຫະພັນແມ່ຍິງລາວສູນກາງສະຫະພັນແມ່ຍິງລາວໄດ້ສຸມໃສ່ລົງຊຸກຍູ້ວຽກງານສ້າງພະນັກງານນໍາພາ-ຄຸ້ມຄອງຢູ່ບັນດາກະຊວງ-ອົງການອ້ອມຂ້າງສູນກາງໃນລະຫວ່າງເດືອນກັນຍາຫາເດືອນຕຸລາ2018 ເປັນຕົ້ນ: ກະຊວງຖະແຫຼງຂ່າວ, ວັດທະນະທໍາແລະທ່ອງທ່ຽວ, ກະຊວງສາທາລະນະສຸກ, ກະຊວງການຕ່າງປະເທດ, ກະຊວງປ້ອງກັນຄວາມສະຫງົບ, ກະຊວງແຮງງານແລະສະຫວັດດີການສັງຄົມ, ກະຊວງການເງິນ, ກະຊວງຍຸຕິທໍາ, ຄະນະຮັບຜິດຊອບພິພິທະພັນໄກສອນພົມວິຫານ, ອົງການໄອຍະການປະຊາຊົນສູງສຸດ, ສູນກາງຊາວໜຸ່ມປະຊາຊົນປະຕິວັດລາວ, ສູນກາງແນວລາວສ້າງຊາດ, ຄະນະກວດກາສູນກາງພັກ,ສຳນັກງານປົກຄອງນະຄອນຫຼວງວຽງຈັນ, ສະຖາບັນການເມືອງ-ການປົກຄອງແຫ່ງຊາດ, ຫ້ອງວ່າການປະທານປະເທດ, ສໍານັກງານນາຍົກ, ຄະນະພົວພັນຕ່າງປະເທດສູນກາງພັກ, ....

      ການລົງເຄື່ອນໄຫວວຽກງານດັ່ງກ່າວຄະນະນໍາສສຍລໄດ້ເຂົ້າພົບຄະນະພັກ, ຄະນະນໍາບັນດາກະຊວງ-ອົງການເພື່ອລາຍງານຈຸດປະສົງຂອງການມາເຄື່ອນໄຫວວຽກງານພ້ອມທັງປຶກສາຫາລືກ່ຽວກັບແຜນກໍານົດສ້າງພະນັກງານນໍາພາ-ຄຸ້ມຄອງເພດຍິງ, ຈາກນັ້ນກໍໍໄດ້ຮ່ວມເຮັດວຽກພ້ອມທັງປຶກສາຫາລືກັບຄະນະບໍລິຫານງານສຍກະຊວງ-ອົງການເພື່ອປຶກສາຫາລືກ່ຽວກັບວຽກງານພັດທະນາແມ່ຍິງ, ການສ້າງພະນັກງານສືບທອດປ່ຽນແທນ, ການຊຸກຍູ້ສົ່ງເສີມໃຫ້ແມ່ຍິງໄດ້ຍົກລະດັບຄວາມຮູ້ຄວາມສາມາດໃນດ້ານຕ່າງໆເພື່ອໃຫ້ແທດເໝາະກັບວຽກງານໃນໄລຍະໃໝ່.ຊຶ່ງແຕ່ລະພາກສ່ວນໄດ້ລາຍງານໂດຍຫຍໍ້ກ່ຽວກັບແຜນການສ້າງພະນັກງານເພດຍິງ, ໄລຍະຜ່ານມາຄະນະພັກຄະນະນໍາບັນດາກະຊວງ, ອົງການໄດ້ເອົາໃຈໃສ່ຕໍ່ວຽກງານສົ່ງເສີມຄວາມກ້າວໜ້າຂອງແມ່ຍິງ,  ການປະຕິບັດສິດສະເໝີພາບຍິງ-ຊາຍກໍຄືການປະຕິບັດສົນທິສັນຍາແລະຖະແຫຼງການຕ່າງໆທີ່ພົວພັນເຖິງສິດຜົນປະໂຫຍດຂອງແມ່ຍິງແລະເດັກນ້ອຍ, ໂດຍການສ້າງເງື່ອນໄຂໃຫ້ແມ່ຍິງໄດ້ພັດທະນາຕົນເອງຢ່າງຮອບດ້ານໂດຍສະເພາະຍົກລະດັບຄວາມຮູ້ຄວາມສາມາດທາງດ້ານທິດສະດີການເມືອງ-ການປົກຄອງ, ວິຊາສະເພາະແລະພາສາຕ່າງປະເທດທັງໄລຍະສັ້ນແລະໄລຍະຍາວ, ສ້າງໂອກາດໃຫ້ແມ່ຍິງໄດ້ເຂົ້າຮ່ວມຝຶກອົບຮົມແລກປ່ຽນບົດຮຽນຄວາມຮູ້ ແລະປະສົບການຢູ່ພາຍໃນແລະ ຕ່າງປະເທດ,ໃຫ້ແມ່ຍິງມີຄວາມຮູ້ຄວາມສາມາດສ້າງຄວາມເຂັ້ມແຂງກ້າວຂຶ້ນສູ່ຕໍາແໜ່ງນໍາພາ-ຄຸ້ມຄອງໃຫ້ຫຼາຍຂຶ້ນແລະໄດ້ປະກອບສ່ວນເຂົ້າຮ່ວມທຸກການເຄື່ອນໄຫວວຽກງານຂອງພັກ-ລັດໃຫ້ແມ່ຍິງມີບົດບາດສູງເດັ່ນຂຶ້ນ,ສິ່ງສໍາຄັນເອື້ອຍນ້ອງແມ່ຍິງເອງກໍຕ້ອງໄດ້ເພີ່ມທະວີໃນການສຶກສາຄົ້ນຄວ້າ,ສູ້ຊົນຝຶກຝົນຫຼໍ່ຫຼອມຕົນເອງໃນທຸກດ້ານເພີ່ມຄວາມກ້າຫານກ້າຄິດກ້າສະແດງອອກໂດຍສະເພາະໃນການປະກອບຄໍາຄິດຄໍາເຫັນ,ຍົກສູງນໍ້າໃຈເສຍສະຫຼະຜ່ານຜ່າຂໍ້ຫຍຸ້ງຍາກແລະຕ້ານທຸກປະກົດການຫຍໍ້ທໍ້ໃນສັງຄົມເພື່ອກຽມພ້ອມແກ່ການກະກຽມບຸກຄະລາກອນໃຫ້ແກ່ກອງປະຊຸມໃຫຍ່ 3 ຂັ້ນ.