10311

ໃນລະຫວ່າງວັນທີ 20-21 ກັນຍາ2018, ຄະນະຜູ້ແທນລາວນໍາໂດຍທ່ານອາລຸນແກ້ວກິດຕິຄຸນລັດຖະມົນຕີປະຈຳສຳນັກງານນາຍົກລັດຖະມົນຕີ,ຮອງປະທານຄະນະກຳມາທິການແຫ່ງຊາດເພື່ອຄວາມກ້າວ ຫນ້າຂອງແມ່ຍິງແລະແມ່-ເດັກແຫ່ງສປປລາວແລະທ່ານນາງບັນດິດປະທຸມວັນຮອງປະທານສສຍລຮອງຄະນະກໍາມາທິການແຫ່ງຊາດເພື່ອຄວາມກ້າວຫນ້າຂອງແມ່ຍິງແລະແມ່-ເດັກໄດ້ເຂົ້າຮ່ວມກອງປະຊຸມຄັ້ງທີ 79ຂອງຄະນະກຳມະການສິດທິເດັກ, ສໍານັກງານອົງການສປຊຊຶ່ງຈັດຂຶ້ນຢູ່ນະຄອນເຈນີວາ,ປະເທດສະວິດເຊີແລນເພື່ອປະເມີນຜົນແລະທົບທວນຄືນ ກ່ຽວກັບການຈັດຕັ້ງປະຕິບັດສິດທິເດັກຂອງສປປລາວນັບແຕ່ການທົບທວນປະຈໍາໄລຍະຄັ້ງທີສອງໃນປີ 2010ຈົນຮອດປັດຈຸບັນ.ກອງປະຊຸມໄດ້ດໍາເນີນພາຍໃຕ້ການເປັນປະທານຮ່ວມ ຂອງທ່ານອາລຸນແກ້ວກິດຕິຄຸນຫົວຫນ້າຄະນະຜູ້ແທນຝ່າຍລາວແລະທ່ານນາງຣິເນັດວິນເຕີ (Ms. Renate WINTER)ປະທານຄະນະກຳມະການສິດທິເດັກສປຊໂດຍມີຄະນະຜູ້ແທນ ແລະຜູ້ຕາງໜ້າຈາກບັນດາອົງການຈັດຕັ້ງສາກົນ, ອົງການຈັດຕັ້ງສາກົນບໍ່ຂຶ້ນກັບລັດຖະບານແລະສື່ມວນຊົນຕ່າງປະເທດຈຳນວນໜຶ່ງໃນຖານະຜູ້ສັງເກດການ.

     ທ່ານອາລຸນແກ້ວກິດຕິຄຸນໄດ້ຍົກໃຫ້ເຫັນເຖິງຜົນງານອັນພົ້ນເດັ່ນແລະຄວາມຄືບໜ້າໃນການຈັດຕັ້ງປະຕິບັດສິດທິເດັກຢູ່ ສປປ ລາວ ນັບແຕ່ການທົບທວນຄັ້ງທີສອງຜ່ານມາໂດຍທ່ານໄດ້ຍົກ ໃຫ້ເຫັນເຖິງຜົນສໍາເລັດຂອງການຈັດຕັ້ງປະຕິບັດນະໂຍບາຍ, ລັດຖະທໍານູນແລະບັນດາກົດໝາຍ, ການບູລະນະການປົກຄອງ, ການສ້າງລັດແຫ່ງກົດໝາຍ, ແຜນພັດທະນາເສດຖະກິດ-ສັງຄົມ ,ການລົບລ້າງຄວາມທຸກຍາກ, ການປະຕິບັດເປົ້າໝາຍສະຫັດສະວັດດ້ານການພັດທະນາ, ການຮ່ວມມືສາກົນດ້ານສິດທິເດັກແລະການຈັດຕັ້ງປະຕິບັດສົນທິສັນຍາດ້ານສິດທິເດັກທີ່ ສປປລາວເປັນພາຄີ. ຜົນສໍາເລັດທີ່ຍາດມາໄດ້ເປັນກ້າວໆໃນໄລຍະ5 ປີ ຜ່ານມານັ້ນໄດ້ເຮັດໃຫ້ເດັກນ້ອຍລາວບັນດາເຜົ່າໄດ້ຊົມໃຊ້ສິດທິພື້ນຖານຂອງເຂົາເຈົ້າຕາມລັດຖະທໍາມະນູນແລະກົດໝາຍ. ບັນດາຄະນະກຳມະການສິດທິເດັກສປຊທີ່ອອກຄໍາເຫັນລ້ວນແຕ່ສະແດງຄວາມຍ້ອງຍໍຊົມເຊີຍແລະຕີລາຄາສູງຕໍ່ຜົນສໍາເລັດຂອງສປປລາວໃນການປົກປ້ອງແລະສົ່ງເສີມສິດທິຂອງເດັກນ້ອຍລາວບັນດາເຜົ່າພ້ອມສະໜັບສະໜູນຄວາມພະຍາຍາມຂອງສປປລາວໃນການຈັດຕັ້ງປະຕິບັດບັນດາຂໍ້ສະເໜີແນະໃນການທົບທວນປະຈໍາໄລຍະຄັ້ງທີສອງ.

      ນອກຈາກນັ້ນ, ຄະນະຜູ້ແທນລາວຍັງໄດ້ໃຫ້ຂໍ້ມູນເພີ່ມເຕີມຕໍ່ບາງບັນຫາທີ່ຄະນະກຳມະການສິດທິເດັກ ສປຊທີ່ມີຄວາມສົນໃຈໃນຫຼາຍຂົງເຂດວຽກງານເປັນຕົ້ນ: ວຽກຄຊກມດ: ວຽກຄວາມຮຸນແຮງຕໍ່ເດັກ, ວຽກງານແນວລາວສ້າງຊາດ,ວຽກງານໂທລະຄົມມະນາຄົມແລະການສື່ສານ, ວຽກງານສຶກສາ, ວຽກງານສາທາລະນະສຸກ, ວຽກງານຍຸຕິທຳ, ວຽກຊັບພະຍາກອນທຳມະຊາດແລະສິ່ງແວດລ້ອມ,ວຽກງານແຮງງານແລະສະຫວັດດີການສັງຄົມ, ວຽກງານປ້ອງກັນຄວາມສະຫງົບ,ວຽກງານແຜນການແລະການລົງທຶນ, ວຽກງານຖະແຫຼງຂ່າວ, ວັດທະນະທໍາແລະທ່ອງທ່ຽວ, ວຽກງານການຕ່າງປະເທດ, ວຽກງານກວດກາລັດຖະບານ, ວຽກງານສານປະຊາຊົນ. ຄໍາອະທິບາຍ, ຊີ້ແຈງຂອງຄະນະຜູ້ແທນສປປລາວໄດ້ເຮັດໃຫ້ຄະນະກຳມະການສິດທິເດັກສປຊແລະຜູ້ເຂົ້າຮ່ວມອື່ນໆ ມີຄວາມເຂົ້າອົກເຂົ້າໃຈເປັນຢ່າງດີກ່ຽວກັບການປະຕິບັດສິດທິຂອງເດັກລາວບັນດາເຜົ່າຢູ່ ສປປລາວ.

      ພາຍຫຼັງສຳເລັດການອະທິບາຍຊີ້ແຈງຂອງຄະນະຜູ້ແທນລາວແລ້ວ,ຄະນະກຳມະການສິດທິເດັກສປຊພາຍຫຼັງທີ່ໄດ້ພິຈາລະນາບົດລາຍງານແລະການອະທິບາຍຊີ້ແຈງເຊິ່ງຫນ້າຂອງຄະນະຜູ້ແທນຂອງສປປລາວແລ້ວຄະນະກຳມະການສິດທິເດັກສປຊກໍຈະມີຂໍ້ສະເໜີແນະຕ່າງໆຕໍ່ບົດລາຍງານແຫ່ງຊາດປະຈໍາໄລຍະ3-6 ກ່ຽວກັບການຈັດຕັ້ງປະຕິບັດສົນທິສັນຍາວ່າດ້ວຍສິດທິເດັກຢູ່ ສປປ ລາວ ພາຍໃນເດືອນຕຸລາ 2018.