8687

   ເພື່ອສະຫຼຸບຕີລາຄາການເຄື່ອນໄຫວວຽກງານຮອບດ້ານຂອງສະຫະພັນ ແມ່ຍິງລາວ (ສຍ ລາວ) 1 ປີ ຜ່ານມາ ພ້ອມທັງວາງ ທິດທາງແຜນການ ໃນປີ 2018 ແລະ ສະຫຼຸບຕີລາຄາການຈັດຕັ້ງປະ ຕິບັດມະຕິກອງປະຊຸມຄົບຄະນະບໍລິຫານງານສູນກາງສະຫະພັນ ແມ່ຍິງລາວ (ສສຍລ) ຄັ້ງທີ 2 ສະໄໝທີ VII, ການປະຕິບັດຄຳ ຂວັນ ແລະ ຂໍ້ແຂ່ງຂັນ 3 ດີ ຕິດພັນກັບສາມສ້າງເຂົ້າສູ່ລວງເລິກ, ການຈັດຕັ້ງປະຕິບັດແຜນງານ, ໂຄງການທີ່ຕິດພັນກັບການ ເຊື່ອມໂຍງພາກພື້ນ ແລະ ສາກົນຕາມພາລະບົດບາດ ແລະ ຄວາມຮັບ ຜິດຊອບຂອງ ສຍ ລາວ ແຕ່ລະຂັ້ນ, ສສຍລ ໄດ້ດຳເນີນ ກອງປະຊຸມຄົບຄະນະບໍລິຫານງານ ສສຍລ ຄັ້ງທີ 3 ສະໄໝທີ VII ລະຫວ່າງວັວັນທີ 22-24 ພະຈິກໂດຍການໃຫ້ກຽດເຂົ້າຮ່ວມຂອງທ່ານ ຈັນສີ ໂພສີຄຳ ກຳມະການກົມການເມືອງສູນກາງພັກ, ຄະນະເລຂາທິການສູນ ກາງພັກ, ຫົວໜ້າຄະນະຈັດຕັ້ງສູນກາງພັກ. ມີຄະນະປະທານ, ຄະນະບໍລິຫານງານ ສສຍລ, ປະທານ, ຮອງປະທານ ສຍບັນດາກະຊວງ-ອົງການ,ນະຄອນຫຼວງແລະ ແຂວງ, ຕາງໜ້າຈາກອົງການພາຄີ, ຄະນະຫ້ອງການ, ກົມ, ສູນ, ຄຊກມດ, ບໍລິສັດລັດວິສາຫະກິດຝ້າຍລາວທີ່ຂຶ້ນກັບ ສສຍລ 76 ທ່ານ, ເປັນຍິງ 70 ທ່ານ.

      ທ່ານ ດຣ. ນາງ ອິນລາວັນ ແກ້ວບຸນ ພັນ ກຳມະການສູນກາງພັກ, ປະທານຄະ ນະບໍລິຫານງານ ສສຍລ ກ່າວເປີດ ແລະ ນຳພາດຳເນີນກອງປະຊຸມຢ່າງເປັນທາງການ. ຈາກນັ້ນ ຜູ້ເຂົ້າຮ່ວມໄດ້ຮັບຟັງການ ສະຫຼຸບຕີລາຄາການເຄື່ອນໄຫວວຽກງານຮອບດ້ານ ຂອງ ສຍ ລາວ ໃນໜຶ່ງປີຜ່ານມາ ແລະ ທິດທາງແຜນການປະຈຳປີ 2018 ຈາກ ທ່ານນາງ ບັນດິດ ປະທຸມວັນ ຮອງປະທານຄະນະບໍລິ ຫານງານ ສສຍລ ຊຶ່ງໄດ້ຍົກໃຫ້ເຫັນຜົນງານທີ່ພົ້ນເດັ່ນຫຼາຍດ້ານໂດຍສະເພາະການຕີລາຄາດ້ານດີ ະແດງອອກສະມາຊິກ ສຍ, ແມ່ຍິງລາວບັນດາ ເຜົ່າມີຄວາມເຊື່ອໝັ້ນຕໍ່ການນຳພາຂອງພັກ-ລັດ, ຕັ້ງໜ້າປະຕິບັດ 2 ໜ້າທີ່ຍຸດທະສາດ ກໍຄືປົກປັກຮັກສາ ແລະ ສ້າງສາພັດທະນາ ປະເທດຊາດ, ຮັກສາໄດ້ຄຸນລັກສະນະທີ່ ເປັນມູນເຊື້ອຂອງແມ່ຍິງລາວ ປະກອບສ່ວນ ເຂົ້າ ໃນຂະບວນການລວມຂອງຊາດ, ຂອງ ພັກ; ການຈັດຕັ້ງ ສຍ ແຕ່ລະຂັ້ນໄດ້ຮັບການປັບປຸງທາງດ້ານກົງຈັກ ແລະ ບຸກຄະລາກອນໃຫ້ສອດຄ່ອງຕາມພາລະບົດບາດໜ້າທີ່ ແລະ ຄວາມ ຮຽກຮ້ອງຕ້ອງການຕົວຈິງ; ການຈັດຕັ້ງປະຕິບັດຄຳຂວັນ, ຂໍ້ແຂ່ງຂັນ 3 ດີ ຕິດພັນກັບທິດສາມສ້າງ ແລະ ການສົ່ງເສີມສິດສະເໝີພາບລະ ຫວ່າງຍິງ-ຊາຍໃນຄອບຄົວ, ພ້ອມນີ້ ຄະນະ ສຍ ແຕ່ລະຂັ້ນໄດ້ເອົາໃຈໃສ່ປະສານສົມທົບ, ຂໍທິດຊີ້ນຳຈາກພາກສ່ວນກ່ຽວຂ້ອງໃນການ ຍາດແຍ່ງທຶນຮອນ ແລະ ປະສົບການທັງ ພາຍໃນ ແລະ ຕ່າງປະເທດ, ປະຕິບັດພັນ ທະສາກົນທີ່ກ່ຽວພັນເຖິງການພັດທະນາ ແລະ ປົກປ້ອງສິດຜົນປະໂຫຍດຂອງແມ່ຍິງ ແລະ ເດັກນ້ອຍ, ສົ່ງເສີມຄວາມສະເໝີພາບຍິງ-ຊາຍ ກໍຄືຄວາມກ້າວໜ້າຂອງແມ່ຍິງ.

      ຜູ້ເຂົ້າຮ່ວມຍັງໄດ້ຮັບຟັງບົດສະຫຼຸບການຈັດຕັ້ງປະຕິບັດມະຕິກອງປະຊຸມຄົບຄະນະບໍລິຫານງານ ສສຍລ ຄັ້ງທີ 2 ສະໄໝທີ VII, ການສະຫຼຸບຕີລາຄາການຈັດຕັ້ງປະຕິບັດວຽກງານໃຫ້ຄຳປຶກສາ ແລະ ປົກປ້ອງແມ່ຍິງ-ເດັກນ້ອຍ, ການຝຶກອົບ ຮົມວິຊາຊີບໃຫ້ແມ່ຍິງ, ການປະຕິບັດຂໍ້ ແຂ່ງຂັນ 3 ດີ ໄລຍະ I ແລະ ການຜັນຂະຫຍາຍວຽກງານສາມສ້າງເຂົ້າສູ່ລວງເລິກ, ກົນໄກ ການປະສານງານວຽກງານ ພົວພັນ ແລະ ຮ່ວມມືກັບຕ່າງປະເທດ, ການປະເມີນບ້ານປະຕິບັດສິດສະເໝີພາບຍິງ-ຊາຍ, ສົ່ງເສີມ ແລະ ພັດທະນາເດັກ ປາສະຈາກ ການໃຊ້ຄວາມຮຸນແຮງຕໍ່ແມ່ຍິງ ແລະ ເດັກ ແລະ ການສະເໜີໂຄງການຈຳປາຄຳຮ່ວມໃຈພັດທະນາແມ່ຍິງŽ ຈາກພາກສ່ວນກ່ຽວຂ້ອງ ຊຶ່ງຜູ້ເຂົ້າຮ່ວມກອງປະຊຸມ ໂດຍສະເພາະຄະນະນຳ ສຍ ບັນດາແຂວງ, ກະຊວງ-ອົງການກໍໄດ້ປະກອບຄຳຄິດເຫັນຕໍ່ຫົວຂໍ້, ບັນຫາ ທີ່ຕິດພັນຢ່າງກົງໄປກົງມາ ແລະ ມີລັກສະນະສ້າງສັນ ເຮັດໃຫ້ເນື້ອ ໃນການສະຫຼຸບຕີລາຄາວຽກງານດັ່ງກ່າວສົມບູນຄົບຖ້ວນຍິ່ງຂຶ້ນ.

88

ໃນວາລະກອງປະຊຸມ, ຄະນະບໍລິຫານງານ ສສຍລ ໄດ້ຜ່ານບົດສຳຫຼວດການນຳພາ ພ້ອມທັງແບ່ງໜ່ວຍເພື່ອດຳ ເນີນຊີວິດ ການເມືອງພາຍໃນຄະນະ ຊຶ່ງໄດ້ຮ່ວມກັນຊອກຫາຈຸດດີ ແລະ ຈຸດຄົງຄ້າງ ທີ່ຖອດຖອນເປັນບົດຮຽນໃນການສືບຕໍ່ຊີ້ນຳນຳພາການປະ ຕິບັດມະຕິກອງປະ ຊຸມຄົບຄະນະບໍລິຫານງານ ສສຍລ ຄັ້ງທີ 3 ສະໄໝທີ VII ໃຫ້ບັນລຸຕາມທິດທາງ ແຜນການທີ່ວາງໄວ້.

      ໂອກາດສຳຄັນນີ້, ທ່ານ ຈັນສີ ໂພສີຄຳ ໄດ້ໂອ້ລົມຕໍ່ກອງປະຊຸມ ຊຶ່ງທ່ານ ເນັ້ນໃຫ້ຄະນະ ສຍ ແຕ່ລະຂັ້ນສືບຕໍ່ສຶກ ສາອົບຮົມ ສະມາຊິກ ສຍ, ແມ່ຍິງລາວບັນດາເຜົ່າໃຫ້ມີຄຸນທາດການເມືອງໜັກແໜ້ນ, ຄຸນສົມບັດສິນທຳປະຕິວັດ, ຮູ້ຮັກຊາດຮັກກຽດສັກສີ, ຮັກສາຄຸນ ລັກສະນະທີ່ເປັນມູນ ເຊື້ອຂອງແມ່ຍິງລາວ; ຄະນະ ສຍ ຕ້ອງສູ້ຊົນ ຝຶກຝົນຫຼໍ່ຫຼອມຕົນເອງດ້ວຍການບຸກທະລຸ ທັງ 4 ດ້ານ, ແກ້ໄຂທັດສະ ນະຄຳພີຕາຍຕົວ ແນວຄິດຄັບແຄບ ໃຈນ້ອຍ ບໍ່ສະໜັບສະໜູນຊຶ່ງກັນ ແລະ ກັນ; ພ້ອມກັນສ້າງຕົນເອງໃຫ້ມີໂລກະທັດ ແລະ ຊີວະ ທັດທີ່ກ້າວໜ້າ ແລະ ຮຽນຮູ້ສິ່ງໃໝ່ໆ ເພື່ອພັດທະນາຕົນເອງ ແລະ ການຈັດຕັ້ງ, ກ້າຄິດກ້າເຮັດກ້າຮັບຜິດຊອບ, ມີຄວາມສາມັກຄີ ເປັນເອກະພາບກັນຢ່າງແໜ້ນແຟ້ນ ນຳພາຈັດຕັ້ງປະຕິບັດມະຕິກອງປະຊຸມຄົບຄະນະບໍລິຫານງານ ສສຍລ ຄັ້ງນີ້ຢ່າງມີຜົນສຳເລັດ ແລະ ມີຄຸນນະພາບ. 

                 

                                                                                                                                                                                                                                                                                           ໂດຍ: ສີວິໄລ