7

ໃນສັງຄົມລາວປັດຈຸບັນ ມີຫຼາກຫຼາຍອາຊີບໃນຫຼາຍຂົງເຂດທີ່ສາມາດສ້າງລາຍຮັບໃຫ້ແກ່ຄອບຄົວ ແລະ ປະກອບສ່ວນເຂົ້າ ໃນການພັດທະນາເສດຖະກິດ-ສັງຄົມຂອງແຕ່ລະທ້ອງຖິ່ນ ບໍ່ວ່າຈະເປັນ ນັກວິທະຍາສາດ, ນັກກໍ່ສ້າງ, ນັກການຕະຫຼາດ, ນັກບັນຊີ, ແມ່ຄ້າຊາວຂາຍ ແລະ ອື່ນໆ ທີ່ເປັນອາຊີບໃຊ້ແຮງງານ ແລະ ອາຊີບທີ່ໃຊ້ມັນສະໝອງ. ໜັງສືພິມແມ່ຍິງ ລາວສະບັບນີ້ຈະພາທ່ານ ໄປຮູ້ຈັກກັບອາຊີບທີ່ໃຊ້ຫົວຄິດປະດິດສ້າງ, ສີມືແຮງ ງານໃນການຜະລິດຫັດຖະກຳ ຊຶ່ງໄດ້ມີ ການຈັດຕັ້ງເປັນກຸ່ມຫັດຖະກຳຖັກສານ ຂອງບ້ານ ຕາດທອງ ເມືອງສີໂຄດຕະບອງ ນະຄອນຫຼວງວຽງຈັນ.

          ກຸ່ມຫັດຖະກຳຖັກສານດັ່ງກ່ວໄດ້ສ້າງຕັ້ງຂຶ້ນໃນປີ 2013  ເພື່ອຊຸກຍູ້ສົ່ງເສີມຜະລິດຕະພັນຂອງປະຊາຊົນພາຍໃນບ້ານໃຫ້ ກາຍ ເປັນສິນຄ້າ, ສ້າງໃຫ້ເອື້ອຍນ້ອງແມ່ຍິງມີອາຊີບ ສາມາດສ້າງລາຍຮັບໃຫ້ແກ່ຕົນເອງ ແລະ ຄອບຄົວ.  ປັດຈຸບັນຜະລິດຕະພັນຂອງກຸ່ມ ຫັດຖະກຳ ຖັກສານປະກອບມີ: ຖັກກະເປົາທີ່ມີຫຼາຍ ແບບຫຼາຍຂະໜາດ, ຫຼາຍລວດລາຍ, ບໍ່ ວ່າຈະເປັນກະເປົາພາຍ, ກະເປົາຫິ້ວ ແລະ ອີກຫຼາຍໆແບບ ຂຶ້ນຢູ່ກັບການສັ່ງຈອງຂອງລູກຄ້າ ເຊິ່ງລາຄາຂອງກະເປົາເລີ່ມ ແຕ່ 100,000 ກີບ ຫາ 250,000 ກີບ, ສະເລ່ຍ ແລ້ວລາຍຮັບຂອງສະມາຊິກພາຍໃນກຸ່ມເດືອນໜຶ່ງຈະໄດ້ ປະມານ 5,000,000-10,000,000 ກີບ ຕໍ່ຄອບຄົວ. ໃນເມື່ອກ່ອນ ການຂາຍແມ່ນໄດ້ເອົາໄປຂາຍຕາມທ້ອງຕະຫຼາດ ຫຼື ງານຕະຫຼາດນັດຕາມສະຖານທີ່ຕ່າງໆ, ແຕ່ມາ ຮອດປັດຈຸບັນໄດ້ມີແມ່ຄ້າມາຮັບຊື້ ຢູ່ກັບທີ່ເຮັດໃຫ້ຍອດຂາຍເພີ່ມຂຶ້ນບາງຄັ້ງກໍ່ບໍ່ສາມາດເຮັດທັນຕາມການສັ່ງຈອງຂອງລູກຄ້າ.

          ທ່ານນາງ ບົວຈັນ ໄຊນາລາຍ ຫົວໜ້າກຸ່ມຫັດຖະກຳ ກ່າວວ່າ: ອາຊີບ ນີ້ເປັນອີກອາຊີບໜຶ່ງທີ່ສືບທອດຈາກວັດທະນະທຳ ຂອງລາວເຮົາ, ເປັນອາຊີບສຸດຈະລິດ, ເປັນວິຊາຊີບໜຶ່ງທີ່ສາມາດລ້ຽງ ຊີບໄດ້ໂດຍການຜະລິດດ້ວຍຫົວຄິດປະດິດສ້າງ ກາຍເປັນຜະ ລິດຕະພັນອອກມາຂາຍ, ມີຫຼາຍຄອບຄົວໄດ້ຍຶດອາຊີບນີ້ເປັນຫຼັກ. ການຫຍິບປັກຖັກແສ່ວແມ່ນງານອັນລະອຽດອ່ອນ ປານີດ ຕ້ອງໃຊ້ ສະມາທິ, ຄວາມພາກພຽນພະຍາຍາມ ແລະ  ອົດທົນ ເພື່ອໄດ້ລວດລາຍທີ່ງົດງາມ. ແຕ່ນັ້ນ ບໍ່ແມ່ນອຸປະສັກ  ຂໍພຽງແຕ່ໃຈມັກຮັກ ກໍ ບໍ່ມີຫຍັງຍາກເກີນຄວາມພະຍາຍາມ. ຜ່ານການດຳເນີນກິດຈະການນີ້ ໄດ້ເຮັດໃຫ້ຫຼາຍຄອບຄົວມີການພັດທະນາທາງດ້ານເສດຖະ ກິດດີຂຶ້ນ ປັດຈຸບັນສະມາຊິກໃນກຸ່ມມີເຮືອນຢູ່ ທີ່ແໜ້ນໜາຖາວອນ, ມີລົດໃຫຍ່ຮັບໃຊ້ກິດຈະການ ແລະ ມີເງິນເກັບທ້ອນໄວ້ໃຊ້ໃນ ຍາມເຈັບເປັນ ແລະ ເປັນທຶນການສຶກສາໃຫ້ລູກ.8

ຜົນສຳເລັດດັ່ງກ່າວ ກໍຍ້ອນມີຄວາມສາມັກຄີ, ການຊ່ວຍເຫຼືອເຊິ່ງກັນ ແລະ ກັນ ລະຫວ່າງສະມາຊິກພາຍໃນກຸ່ມ ບວກກັບ ຄວາມດຸໝັ່ນຂະຫຍັນພຽນ ແລະ ຫົວຄິດປະດິດສ້າງໃນການຄິດລວດລາຍ ແລະ ໄດ້ຮັບການຊຸກຍູ້ສົ່ງເສີມລົງໃກ້ຊິດຕິດແທດຈາກ ອົງການປົກຄອງທຸກຂັ້ນ ໂດຍສະເພາະອົງການຈັດຕັ້ງສະຫະພັນແມ່ຍິງ ຈຶ່ງເຮັດໃຫ້ເອື້ອຍນ້ອງແມ່ຍິງບ້ານຕາດທອງ ໄດ້ມີອາຊີບທີ່ໝັ້ນ ຄົງ ສາມາດ ພັດທະນາຊີວິດການເປັນຢູ່ຂອງຕົນເອງ ແລະ ຄອບຄົວດີຂຶ້ນເປັນກ້າວໆ.

                                                                                                                                                                                                      ໂດຍ: ເພັດທອງຄຳ